हिंगोलीतील भूकंपाचे यवतमाळ जिल्ह्यात धक्के; पुसद, वसंतनगर हादरले, नागरिक भयभीत

नेमकी घटना काय?

नॅशनल सेंटर फॉर सिस्मॉलॉजीच्या अहवालानुसार, भूकंपाचा केंद्रबिंदू हिंगोली जिल्ह्यात होता. जमिनीच्या आत काही किलोमीटर खोलीवर झालेल्या या हालचालींमुळे हिंगोलीसह यवतमाळ, नांदेड आणि परभणी जिल्ह्यांतील काही भागांत कंपने जाणवली. यवतमाळ जिल्ह्यातील पुसद आणि आसपासच्या ग्रामीण भागात सकाळी अचानक भांडी वाजणे, खिडक्यांची तावदाने थरथरणे यांसारखे प्रकार घडल्याने नागरिक घराबाहेर मोकळ्या जागेत धावत आले. या प्रकाराने नागरिक भयभीत झाले.

प्रशासकीय यंत्रणा सतर्क

घटनेची माहिती मिळताच यवतमाळ जिल्हा प्रशासन आणि आपत्ती व्यवस्थापन विभाग तात्काळ सक्रिय झाले आहेत. जिल्हाधिकाऱ्यांनी संबंधित तालुक्यांच्या तहसीलदार आणि महसूल यंत्रणेला सतर्क राहण्याचे आदेश दिले आहेत. यवतमाळ जिल्ह्यात भूकंपाचे सौम्य धक्के जाणवले असले तरी परिस्थिती पूर्णपणे नियंत्रणात आहे. सध्या तरी कोणत्याही नुकसानीची नोंद झालेली नाही. महसूल आणि आपत्ती व्यवस्थापन विभाग परिस्थितीवर बारकाईने लक्ष ठेवून आहे, असे प्रशासनाच्या वतीने सांगण्यात आले.

नागरिकांना आवाहन

भूकंपानंतर सोशल मीडियावर विविध अफवांना ऊत आला आहे. या भूकंपाचे धक्के पुसद, वसंतनगर, शेंबाळपिंपरी आदी भागात बसले. उमरखेड, महागाव तालुक्यातील नागरिकही भूकंपाच्या चर्चेने भयग्रस्त झाले. या पार्श्वभूमीवर प्रशासनाने नागरिकांना अफवांवर विश्वास न ठेवण्याचे आवाहन केले आहे. भूकंप हा नैसर्गिक बदल असून, अफवांवर विश्वास ठेवू नका, असे सांगण्यात आले.

सुरक्षितता महत्त्वाची

जर पुन्हा धक्के जाणवले तर इमारतीमध्ये अडकून न पडता तात्काळ मोकळ्या मैदानात किंवा सुरक्षित ठिकाणी आश्रय घेतला पाहिजे. लिफ्टचा वापर टाळला पाहिजे, असे भूगर्भ शास्त्रज्ञांनी सांगितले.

जिल्ह्याची स्थिती

सध्या पुसद, वसंतनगर आणि परिसरातील जनजीवन पूर्वपदावर येत आहे. स्थानिक पोलीस आणि महसूल कर्मचारी गावोगावी माहिती घेत आहे. आपत्कालीन परिस्थिती उद्भवल्यास तात्काळ प्रतिसाद देण्यासाठी बचाव पथके सज्ज ठेवण्यात आली आहेत. नागरिकांनी शांतता राखावी आणि प्रशासनाला सहकार्य करावे, असे आवाहन जिल्हा प्रशासनातर्फे करण्यात आले आहे.