नागपूर : विधिमंडळाचे अर्थसंकल्पीय अधिवेशन सुरू असतानाच राज्य सरकारने भारतीय प्रशासकीय सेवेतील (आयएएस) अधिकाऱ्यांच्या बदल्यांचा निर्णय घेतला आहे. साधारणपणे अधिवेशनाच्या काळात आयएएस अधिकाऱ्यांच्या बदल्या टाळल्या जातात. मात्र यावेळी सरकारने दोन अधिकाऱ्यांची बदली करत प्रशासकीय स्तरावर फेरबदल केले आहेत.
राज्य सरकारने एका वरिष्ठ अधिकाऱ्याची मंत्रालयात सचिवपदी नियुक्ती केली आहे. तर त्या जागी कार्यरत असलेल्या अधिकाऱ्याची बदली पुणे महानगर विकास प्राधिकरणात करण्यात आली आहे. या बदल्यांमुळे प्रशासनात मर्यादित स्वरूपाचा फेरबदल झाला असून त्याबाबतचे आदेश सामान्य प्रशासन विभागाने जारी केले आहेत. दरम्यान, अधिवेशन सुरू असताना अशा प्रकारे बदल्या होणे विरळा मानले जाते. त्यामुळे या निर्णयाकडे प्रशासकीय वर्तुळात लक्ष लागले आहे.
नागपूर महापालिकेचे आयुक्त डॉ. अभिजीत चौधरी यांची पुण्यात बदली करण्यात आली आहे. त्यांची नियुक्ती पुणे महानगर प्रदेश विकास प्राधिकरण (पीएमआरडीए)च्या महानगर आयुक्तपदी करण्यात आली आहे. नागपूर महापालिकेत पुढील आयुक्त म्हणून कोणाची नियुक्ती होणार, याकडे आता लक्ष लागले आहे.
राज्य सरकारने अद्याप नागपूर महापालिकेच्या नव्या आयुक्ताची घोषणा केलेली नाही. डॉ. चौधरी यांनी २०२४-२५ या आर्थिक वर्षासाठी ५ हजार ५६५ कोटी रुपयांचा अर्थसंकल्प सादर केला होता. तसेच २०२५-२६ या वर्षासाठीचाही अर्थसंकल्प त्यांनीच सादर केला. २०११ च्या बॅचचे आयएएस अधिकारी असलेल्या डॉ. चौधरी यांनी नागपूर महापालिकेत विविध पायाभूत प्रकल्पांना गती दिली. शहरातील पाणीपुरवठा, स्वच्छता आणि स्मार्ट सिटी उपक्रमांच्या अंमलबजावणीत त्यांनी पुढाकार घेतला होता. त्यांच्या बदलीमुळे महापालिका प्रशासनात बदल होणार आहे.
डॉ. चौधरी जून २०२३ मध्ये नागपूर महापालिकेचे आयुक्त म्हणून रुजू झाले होते. त्यांनी तत्कालीन आयुक्त राधाकृष्णन बी. यांची जागा घेतली होती. तत्पूर्वी ते छत्रपती संभाजीनगर येथे राज्य सरकारच्या कर विभागात सहआयुक्त म्हणून कार्यरत होते. यापूर्वी काही काळ त्यांनी छत्रपती संभाजीनगर महापालिकेचे आयुक्त म्हणूनही काम पाहिले आहे.
एमबीबीएसपर्यंत शिक्षण पूर्ण केलेले डॉ. चौधरी हे मूळचे भुसावळचे असून त्यांनी मुंबईतील केईएम रुग्णालयातून वैद्यकीय शिक्षण घेतले. २०१० मध्ये त्यांची आयपीएस म्हणून कर्नाटक कॅडरमध्ये नियुक्ती झाली होती. मात्र, प्रशासकीय सेवेत काम करण्याचे ध्येय ठेवून त्यांनी पुन्हा परीक्षा देत २०११ मध्ये आयएएसमध्ये यश मिळवले. दरम्यान, पुणे महानगर प्रदेश विकास प्राधिकरणाचे विद्यमान महानगर आयुक्त योगेश म्हसे यांची सचिव, अल्पसंख्याक विकास विभाग, मंत्रालय, मुंबई येथे नियुक्ती करण्यात आली आहे. म्हसे हे २००९ च्या एससीएस बॅचचे आयएएस अधिकारी आहेत. राज्य शासनाच्या सामान्य प्रशासन विभागाने या बदल्यांचे आदेश जारी केले आहेत. पुणे आणि नागपूर या दोन्ही महत्त्वाच्या शहरांच्या प्रशासकीय पातळीवर या बदलांकडे लक्ष लागले आहे.
