“क्यू ना टायगर देखा जाये” : क्रिकेटचा सराव संपताच खेळाडू पेंच व्याघ्रप्रकल्पात

रविवारी सायंकाळचा सराव संपताच वरूण ठक्कर सोबत सुर्याकुमार यादव, संजू सॅमसन, रिंकू सिंग, इशान किशन आणि रवी बिष्णोई मध्यप्रदेशातील पेंच व्याघ्रप्रकल्पाच्या दिशेने रवाना झाले. मास्तरब्लास्टर सचिन तेंडुलकरला ताडोबाचे वेड आहे आणि दरवर्षी तो हमखास ताडोबा-अंधारी व्याघ्रप्रकल्पाला भेट देतो. त्यामुळे या क्रिकेटपटूची देखील पहिली पसंती ताडोबाच होती. पण वरूण ठक्कर म्हणाला त्याप्रमाणे ऐनवेळी ताडोबात जाणे शक्यच नव्हते.

“खरं तर सर्वांनाच जंगल सफारी करायची होती, पण हे सगळेच सेलिब्रिटी आणि एवढ्या सगळ्यांना न्यायचे म्हणजे सुरक्षेचाही प्रश्न होताच. शेवटी मी पाच जणांना घेऊन मध्यप्रदेश पेंच व्याघ्रप्रकल्पाकडे निघालो”. यापूर्वी सुर्याकुमार ला वरुण ने जंगल भ्रमंती घडवून आणली होती. पेंच व्याघ्रप्रकल्पात सफारीसाठी या सर्वांना लवकर परवानगी मिळाली. रविवारी रात्री त्यांनी पेंच व्याघ्रप्रकल्पात रिसॉर्टमध्ये रात्री कॅम्पफायर चा आनंद घेतला. दुसऱ्या दिवशी त्यांना जंगलात वाघ बघायचा होता. पेंच व्याघ्र प्रकल्पात रात्री भारतीय क्रिकेट संघातील स्टार खेळाडूंनी आराम केला. हे सर्व खेळाडू रविवारी रात्री पेंच व्याघ्र प्रकल्पातील फॉरेस्ट रिसॉर्टमध्ये पोहोचले. त्यानंतर आज सकाळी मध्य प्रदेशातील तुरिया गेटवरून त्यांनी जंगल सफारीचा आनंद घेतला.

सफारीदरम्यान एका भव्य खडकावर निवांत बसलेला बिबट्या दिसल्याने हा क्षण सर्वांसाठी खास ठरला. अर्थातच सर्वसामान्य पर्यटकांप्रमाणे त्यांचेही डोळे वाघालाच शोधत होते. पण बिबट्यावर त्यांना समाधान मानावे लागले. क्रिकेटपटूंनी जंगलातील शांत वातावरण, जैवविविधता आणि वन्यजीवांचे सौंदर्य जवळून अनुभवले. स्टार खेळाडूंच्या या भेटीमुळे पेंच व्याघ्र प्रकल्प पुन्हा एकदा चर्चेत आला असून पर्यटकांमध्ये उत्सुकता वाढली आहे. “आम्ही बिबट बघत होतो तेव्हा वाघ तेथून अवघ्या १००-१५० किलोमीटर अंतरावर होता. पण आम्ही पोहचेस्तोवर वाघाने आपला मुक्काम हलवला होता. ” असे वरुण ठक्कर याने सांगितले. क्रिकेटचे मैदान गाजवणाऱ्या या खेळाडूंची पेंच सफारी चांगलीच आठवणीत राहील अशी ठरली. यादरम्यान त्यांनी खूप मस्तीही केली. इतर पर्यटकांसोबत सेल्फी देखील काढली.