नागपूर : कोचीहून दिल्लीकडे निघालेल्या इंडिगोच्या विमानात बॉम्ब असल्याचा फोन आल्यानंतर या विमानाचे नागपूरच्या डॉ.बाबासाहेब आंबेडकर आंतरराष्ट्रीय विमानतळावर इमर्जन्सी लँडिंग मंगळवारी सकाळी करण्यात आले.
विमानामध्ये बॉम्ब ठेवल्याचा फोन आल्यानंतर नागपुरात विमानाचे लँडिंग करवण्यात आले आहे. प्रकरणाचे गांभीर्य लक्ष्यात घेता सध्या विमानाची तपासणी सुरू करण्यात आली आहे. नागपूर पोलीस आणि अग्निशमन दल विमानतळावर दाखल झाले असून विमानाची तपासणी सुरू आहे. मात्र या प्रकरणामुळे एअरपोर्टवर काही वेळ एकच पळापळ आणि गोंधळ उडाल्याचे बघायला मिळाले आहे. पुढे आलेल्या माहितीनुसार, गेल्या वीस मिनिटापूर्वी विमान नागपूर विमानतळावर उतरलं आहे.
तपासादरम्यान अजूनपर्यंत काहीही धोकादायक वस्तू आढळलेली नाही. मात्र पोलीस आणि अग्निशमन दल घटनास्थळी दाखल झाले असून ते कसून तपास सध्या करत आहे. प्राप्त माहितीनुसार, हे विमान सकाळी ९.२०वाजता कोचीहून निघालेले आणि दुपारी १२:३५ वाजता दिल्लीत उतरणारे होतं. अशातच विमानातील अधिकाऱ्यांना धोकादायक इशारा मिळाल्यानंतर हे विमान नागपूरला वळवण्यात आले. कोची विमानतळावरील अधिकाऱ्यांनी या धोक्याची पुष्टी केली, ज्यामुळे आपत्कालीन प्रोटोकॉल वाढवण्यात आले आणि सुरक्षा एजन्सींशी तात्काळ समन्वय साधण्यात आला.
दरम्यान, विमानाचे लँडिंग होताच सुरक्षा कर्मचाऱ्यांनी प्रवाशांना तातडीने विमानातून बाहेर काढले. तर बॉम्बशोधक पथकाने विमानाची कसून तपासणी केली. सध्याघडीला जरी अधिकाऱ्यांनी याबाबतचा अधिक तपशील उघड केलेला नसला तरी या नुकतीची गुजरातच्या विमान दुर्घटनेनंतर अशा धमकीच्या फोन ने सर्वत्र एकच खळबळ उडाली आहे.
