Instagram Data Leak : सावधान! इन्स्टाग्राम वापरकर्त्यांसाठी धोक्याची घंटा; जगभरातील १७ दशलक्ष इन्स्टाग्राम खात्यांची माहिती लीक…

याचा अर्थ १७ दशलक्ष वापरकर्त्यांच्या मेल आयडीवरून सायबर ठगांनी त्यांच्या बँकेच्या खात्यांची माहिती मिळवली आहे. अशा परिस्थितीत सध्याच्या समाजमाध्यांच्या जगात प्रत्येकाचे इन्स्टाग्राम, फेसबूक, एक्स अशा विविध ठिकाणी खाते आहेत. त्यामुळे तुमचे खाते तर फिशिंगच्या जाळ्यात अडकले नाही ना… याची खात्री करा असा संदेश सध्या सोशल मिडियावर वेगाने व्हायरल होत आहे.

याचा अर्थ असा नाही की प्रत्येक खाते हॅक झाले आहे. परंतु उघड झालेल्या डेटाचा वापर अनेकदा फिशिंग, खाते ताब्यात घेण्याचे प्रयत्न, ओळख फसवणूक आणि सोशल इंजिनिअरिंग हल्ल्यांसाठी केला जात आहे. त्यामुळे समाजमाध्यमांवर सक्रीय असलेल्या प्रत्येकाच्या मनात धास्ती निर्माण झाली आहे.

कशी होते फिशिंग…

इंस्टाग्रामशी जोडलेले ईमेल आयडी आणि फोन नंबर सायबर गुन्हेगारांकडून मिळवले जातात. वापरकर्ता नावे आणि प्रोफाइल तपशीलचा इतर प्लॅटफॉर्मवरून वापर करत लीक झालेले पासवर्ड पैशांची अफरातफर आणि सेक्स्टॉर्शन फिंगसाठी वापरले जातात. यामुळे लाखो रुपयांची आर्थिक फसवणूक होण्याची जोखीम वाढते.

अशी घ्या काळजी….

तुमचा डेटा लीक झाला असो वा नसो, वापरकर्त्यांनी सावधानता म्हमून ही खबरदारी घेणे अत्यंत आवश्यक आहे. इंस्टाग्रामवरून होणाऱ्या गैरवापराचे प्रकार टाळायचे असतील तर वापरकर्त्यांनी त्यांचा पासवर्ड वेळोवेळी बदलला पाहिजे. सोबतच इंस्टाग्रामशी जोडलेल्या ईमेल खात्याचा पासवर्डही बदलायला हवा. टू-फॅक्टर ऑथेंटिकेशन करताना शक्यतो अधिकृत ॲपद्वारेच ते करावे. थेट आलेले संदेश अर्थात डीएम, ईमेल किंवा सुक्ष्म संदेशवर मिळालेल्या संशयास्पद लिंक्सवर क्लिक करू नका. केवळ अधिकृत संकेतस्थळावरून आलेल्या संदेशांची पडताळणी करा. अज्ञात व्यक्तीने अथवा ॲप्सने संदेश पाठवले असतील तर ते काढून टाका. लॉगिन ॲक्टिव्हिटीवर लक्ष ठेवा आणि अज्ञात डिव्हाइसेसमधून लॉग आउट करा.

तज्ज्ञ काय म्हणतात ….

तुम्हाला संशयास्पद हालचाल किंवा खाते हॅक झाल्याचे आढळल्यास इंस्टाग्रामवरून “तुमचे खाते सुरक्षित करा” किंवा “हॅकची तक्रार करा” हा पर्याय वापरा. तुमच्या फॉलोअर्सना खात्यावरून आलेल्या कोणत्याही असामान्य संदेशांना प्रतिसाद न देण्यास सांगा. – सुनील सदासिवन, सायबर तज्ज्ञ