“लाडकी बहीण योजनेला अजितदादांचे नाव द्या,” कोणी दिला मुख्यमंत्र्यांकडे प्रस्ताव?

राज्याचे उपमुख्यमंत्री अजित पवार यांचे विमान दुर्घटनेत २८ जानेवारीला निधन झाले. या घटनेमुळे संपूर्ण महाराष्ट्रात शोककळा पसरली. त्यानंतर सुनेत्रा पवार यांनी उपमुख्यमंत्री पदाची शपथ घेतली. या सर्व घटनेवर आमदार अमोल मिटकरी यांनी संशय व्यक्त करीत अनेक प्रश्न उपस्थित केले. त्यानंतर आता अजित पवार यांच्या स्मृती जपण्यासाठी त्यांचे नाव लाडक्या बहीण योजनेला देण्याची मागणी अमोल मिटकरी यांनी केली आहे.

अमोल मिटकरी म्हणाले, “लाडक्या बहिणींसाठी सुरु केलेली ही योजना केवळ आर्थिक मदतीची नाही, तर सामाजिक सन्मानाची आहे. अजितदादांनी महिलांच्या सक्षमीकरणासाठी सातत्याने पाठपुरावा केला आणि या योजनेला गती दिली. त्यामुळे त्यांच्या स्मृतींना अनोख्या पद्धतीने आदरांजली द्यायची असेल, तर या योजनेला त्यांचे नाव देणे हीच खरी श्रद्धांजली ठरेल.”

लाडकी बहीण योजनेमुळे राज्याच्या महसुली तुटीत वाढ झाली. योजनांमुळे तिजोरीवर मोठा ताण पडत आहे. सत्ताधारी नेते या योजनेवर कोणतेही संकट येणार नसल्याचे ठामपणे सांगत आहेत. आर्थिक ताण वाढत असल्याचे अजित पवार यांच्या अर्थखात्यानेही पूर्वी पत्रकाद्वारे मान्य केले होते. मात्र तरीही या योजनेवर कोणतेही संकट येऊ नये, यासाठी आवश्यक ती खबरदारी अजितदादांनी घेतली होती. त्यामुळेच आज या योजनेला त्यांचे नाव देण्याची मागणी पुढे आली. अमोल मिटकरी यांनी याआधी व्यक्त केलेल्या शंका आणि मागणी चर्चेत आली आहे.

लाडक्या बहिणींना मिळणाऱ्या मदतीसोबतच आता या योजनेच्या नावाबाबतही मोठी चर्चा सुरु झाली. राज्यातील महत्त्वाकांक्षी लाडकी बहीण योजना विविध निवडणुकांमध्ये देखील केंद्रस्थानी राहिली आहे. सत्तेतील तिन्ही घटक पक्षांमध्ये या योजनेच्या श्रेयावरून चढाओढ लागली असते. या सर्व प्रकरणावर मुख्यमंत्री देवेंद्र फडणवीस, उपमुख्यमंत्री एकनाथ शिंदे काय निर्णय घेतात, हे पाहणे औत्सुक्याचे ठरणार आहे.