परीक्षेच्या तोंडावर वाचनकक्षांच्या क्षमतेवर मर्यादा

नागपूर : करोना रुग्णांची वाढती संख्या बघता राष्ट्रसंत तुकडोजी महाराज नागपूर विद्यापीठाने अमरावती मार्गावरील विद्यापीठ परिसरातील ग्रंथालयातील वाचनकक्षाची क्षमता ५० टक्क्यांवर आणली आहे. मात्र, आगामी काळात विद्यार्थ्यांच्या परीक्षा असल्याने याला तीव्र विरोध होत आहे. याविरोधात विद्यार्थ्यांनी विद्यापीठासमोर आंदोलन करीत कुलसचिवांना वाचनकक्षाची क्षमता वाढवण्याची मागणी केली. विद्यापीठाच्या अमरावती मार्गावरील शैक्षणिक परिसरामधील ग्रंथालयामध्ये नव्याने वाचनकक्ष तयार करण्यात आले आहे. वाचनकक्षाची इमारत नवीन असली तरी येथील बैठक व्यवस्था आणि इतर सुविधांची दुरवस्था आहे. येथे खुच्र्याची क्षमताही कमी असल्याने आधीच विद्यार्थी कमी बसतात. मात्र, असे असतानाही विद्यापीठाने करोनाचे कारण समोर करून येथील बैठक क्षमताच कमी केली आहे.

येथे अभ्यासाला येणारे विद्यार्थी हे विद्यापीठाच्या विविध विभागांमधील प्रवेशित आहेत. ग्रामीण भागातून शिक्षणासाठी येणाऱ्या विद्यार्थ्यांना वाचनकक्ष हेच एक अभ्यासाचे ठिकाण असते. त्यात आगामी काळात विविध स्पर्धा परीक्षा होणार आहेत. परीक्षांच्या तारखा तोंडावर असताना विद्यापीठाने वाचनकक्षाची क्षमता कमी केली. त्यामुळे आता अध्र्या विद्यार्थ्यांना येथे प्रवेश नाकारण्यात येणार आहे. त्यामुळे विद्यार्थ्यांसमोर गंभीर समस्या निर्माण झाली असून डॉ. बाबासाहेब आंबेडकर विद्यार्थी संघटनेच्या वतीने कुलसचिव डॉ. राजू हिवसे यांना निवेदन देत बैठक क्षमता वाढवण्याची मागणी करण्यात आली आहे. यावर कुलसचिवांनी शासकीय नियमांचे पालन करून योग्य तो निर्णय घेण्याचे आश्वासन दिले. निवेदनामध्ये अन्य मागण्याही करण्यात आल्या आहेत. यानुसार, पीएच.डी. नोंदणीच्या तारखेत वाढ करण्याची मागणी करण्यात आली आहे. तसेच कर्मचारी संपामुळे विद्यार्थ्यांना विविध प्रमाणपत्र मिळवण्यात अडचणी येत असल्याने मायग्रेशन प्रमाणपत्रासह अन्य कागदपत्रांसाठी पर्यायी व्यवस्था तयार करावी अशी मागणी करण्यात आली आहे.