नागपूर : महावितरणने गेल्या पाच वर्षांत वाहनांच्या भाडेदरात वाढ न केल्याने राज्यभरातील वाहन पुरवठादार संतप्त झाले आहेत. इंधन दरवाढ, वाढता खर्च आणि आर्थिक तोट्यामुळे त्यांनी कामबंद आंदोलनाचा इशारा दिला आहे. पावसाळ्याच्या तोंडावर हे आंदोलन झाले तर वीजवाहिन्यांची दुरुस्ती आणि आपत्कालीन सेवा विस्कळीत होऊन वीजपुरवठ्यावर परिणाम होण्याची भीती व्यक्त केली जात आहे.
महावितरणच्या वाहन पुरवठादारांनी कामबंदचा इशारा का दिला आहे?
इंधन दरवाढ, वाहन देखभाल खर्च आणि चालकांच्या वेतनात सातत्याने वाढ होत असताना महावितरणकडून वाहन भाडेदरात गेल्या पाच वर्षांपासून कोणतीही वाढ करण्यात आलेली नाही. त्यामुळे नागपूरसह राज्यातील विविध जिल्ह्यांतील वाहन पुरवठादारांनी कामबंद आंदोलनाचा इशारा दिला आहे.
महावितरणकडून कोणती वाहने भाड्याने घेतली जातात?
महावितरणकडून अधिकाऱ्यांच्या वापरासाठी टॅक्सी तसेच वीजवाहिन्यांची देखभाल, बिघाड दुरुस्ती आणि आपत्कालीन कामांसाठी ‘टॉवर लँडर’सह विविध वाहने भाडेतत्त्वावर घेतली जातात. वीज यंत्रणा सुरळीत ठेवण्यासाठी ही वाहने महत्त्वाची भूमिका बजावतात.
वादाचा नेमका मुद्दा काय आहे?
वाहन पुरवठादारांच्या मते, २७ फेब्रुवारी २०२० रोजी निश्चित करण्यात आलेल्या भाडेदरात आजपर्यंत कोणतीही वाढ झालेली नाही. मात्र या कालावधीत इंधन, सुटे भाग, वाहन देखभाल, विमा आणि चालकांचे वेतन यामध्ये मोठी वाढ झाली आहे. त्यामुळे वाहन चालविणे आर्थिकदृष्ट्या परवडेनासे झाले आहे.
याचा किती लोकांवर परिणाम होत आहे?
राज्यभरात सुमारे ७०० टॅक्सी आणि ७०० ‘टॉवर लँडर’ महावितरणच्या सेवेत कार्यरत आहेत. या वाहनांवर अवलंबून असलेल्या सुमारे तीन हजार कुटुंबांपुढे आर्थिक संकट उभे राहिले आहे. अनेक वाहन पुरवठादार कर्जबाजारी झाल्याचा दावा संघटनांनी केला आहे.
कामबंद झाल्यास वीजपुरवठ्यावर काय परिणाम होऊ शकतो?
पावसाळ्याच्या काळात वीजवाहिन्यांमध्ये बिघाड, खांब कोसळणे, झाडांच्या फांद्या पडणे आणि तातडीच्या दुरुस्तीची कामे वाढतात. अशा वेळी दुरुस्ती पथकांना वाहने उपलब्ध न झाल्यास बिघाड दुरुस्त करण्यात विलंब होऊ शकतो. परिणामी अनेक भागांतील वीजपुरवठा विस्कळीत होण्याचा धोका निर्माण होऊ शकतो.
पुरवठादारांनी प्रशासनाकडे काय मागणी केली आहे?
तातडीने वाहन भाडेदरात वाढ करून वाढलेल्या खर्चाचा विचार करावा, अशी मागणी पुरवठादारांनी केली आहे. यासंदर्भात नागपूरसह विविध जिल्ह्यांतील संघटनांनी महावितरणच्या मुख्य अभियंत्यांना निवेदने दिली आहेत.
महापारेषणने काय केले होते?
वाहन पुरवठादारांच्या म्हणण्यानुसार, महापारेषणने २०२१ मध्ये वाहन भाडेदरात वाढ केली होती. मात्र महावितरणकडून अद्याप कोणताही निर्णय घेण्यात आलेला नसल्याने पुरवठादारांमध्ये नाराजी वाढली आहे.
सध्या महावितरण किती भाडे देते?
महावितरणकडून अधिकाऱ्यांसाठी २४ तास उपलब्ध असणाऱ्या वाहनासाठी मासिक २९ हजार ९०० रुपये भाडे दिले जाते. तर ‘टॉवर लँडर’साठी ३७ हजार ३०० रुपये मासिक भाडे मिळते. या रकमेत चालकांचे वेतन, इंधन खर्च, देखभाल खर्च आणि वाहन कर्जाचे हप्ते भागवणे कठीण जात असल्याचा दावा पुरवठादारांनी केला आहे.
वाहन पुरवठादारांचे म्हणणे काय?
‘महावितरणकडे पाच वर्षांपासून दरवाढीची मागणी करूनही काहीच झाले नाही. इंधन दरवाढीमुळे आम्ही कर्जबाजारी झालो असून चालकांचे वेतन देणेही कठीण झाले आहे. त्यामुळे नाईलाजाने आंदोलनाचा मार्ग स्वीकारावा लागत आहे,’ असे नवचेतना टॅक्सी चालक-मालक संघटनेचे सचिव योगेश गोमासे यांनी सांगितले.
महावितरणची भूमिका काय आहे?
‘वाहन पुरवठादारांनी संयम ठेवून वरिष्ठ पातळीवर आपले म्हणणे मांडावे. प्रशासनाकडून नियमानुसार योग्य कार्यवाही केली जाईल,’ असे महावितरणचे मुख्य जनसंपर्क अधिकारी भारत पवार यांनी स्पष्ट केले आहे.
आता पुढे काय?
दरवाढीबाबत लवकर निर्णय न झाल्यास वाहन पुरवठादार कामबंद आंदोलनाची भूमिका घेण्याची शक्यता आहे. पावसाळ्याच्या तोंडावर हा वाद चिघळल्यास महावितरणसमोर वीजपुरवठा सुरळीत ठेवण्याचे मोठे आव्हान उभे राहू शकते.
