MPSC : राज्य लोकसेवा आयोगाच्या अध्यक्षपदी वर्धेकर विवेक भीमनवार; सूत्रे स्वीकारली! म्हणतात…

महाराष्ट्र केडरचे अधिकारी असलेले भीमनवार हे मूळचे वर्धा जिल्ह्यातील हिंगणघाट येथील आहे. त्यांचे शिक्षण एमएससी, एलएलबी असे झालेले आहे. त्यांनी परिवहन आयुक्त व अन्य पदे मंत्रालयात भूषविली आहेत. तसेच वर्धा जिल्हाचे जिल्हाधिकारी म्हणून त्यांनी करोना काळात केलेल्या कामाची नागरिक आजही आठवण ठेवून आहेत. या काळात त्यांनी स्वयंसेवी संस्थांच्या माध्यमातून लोकांना निवारा व अन्य स्वरूपात मदत देण्याचे कार्य यशस्वी केले होते.

शासनाची मदत मिळण्यापूर्वी असे स्वयंस्फुर्त काम सूरू करणारा वर्धा हंस राज्यातील पहिला जिल्हा ठरला होता. त्याबद्दल त्यांचा राज्य शासनाने गौरव पण केला होता. परिवहन आयुक्त म्हणून काम करतांना त्यांनी नागरिक केंद्रित सुधारणा घडवून आणल्याचे सांगीतलं जाते.

आज राज्यपाल देवव्रत यांनी लोकसेवा आयोगाच्या अध्यक्षपदाची शपथ विवेक भीमनवार यांना दिली. याप्रसंगी मुख्यमंत्री देवेंद्र फडणवीस व उपमुख्यमंत्री एकनाथ शिंदे प्रामुख्याने उपस्थित होते. तसेच आयोगाचे माजी अध्यक्ष रजनीश सेठ, सचिव महेंद्र हरपळकर, सदस्य डॉ. अभय वाघ, डॉ. दिलीप पाटील भुजबळ, राजीव निवटकर, डॉ. सतीश देशपांडे, विधी विभागाचे मुख्य सचिव दिलीप घुमरे याची पण उपस्थिती होती.

आयोगाचे अध्यक्ष म्हणून भीमनवार यांना दोन वर्षाची मुदत मिळणार आहे. या संदर्भात बोलतांना ते म्हणाले की आजच मी आयोगाचा अध्यक्ष म्हणून सूत्रे स्वीकारली आहे. प्रथम सर्व बाबी जाणून घेणार. कार्यपद्धती समजून घ्यावी लागेल. त्यानंतरच या आयोगाच्या वाटचालीवर भाष्य करता येईल.