नागपूर : मुंबई ते अहमदाबाद बुलेट ट्रेननंतर देशातील वेगवान रेल्वे प्रकल्पांना गती देत केंद्र सरकारने सात बुलेट ट्रेन मार्गांचे नियोजन सुरू केले असून, महाराष्ट्रातील महत्त्वाच्या मार्गांचाही त्यात समावेश करण्यात आला आहे. राज्याची राजधानी मुंबई आणि उपराजधानी नागपूर बुलेट ट्रेनचा प्रस्ताव चर्चेत असला तरी सध्या मुंबई-पुणे आणि पुणे-हैदराबाद या मार्गांना प्राधान्य देण्यात आले आहे. या पार्श्वभूमीवर पुणेकर व मुंबईकरांसाठी ही आनंदाची बातमी असली, तरी नागपूर ते मुंबई या मार्गावरील बुलेट ट्रेनच्या मागणीचं काय झालं? असा प्रश्नदेखील या घोषणेनंतर उपस्थित करण्यात येत आहे.
मुंबई-पुणे बुलेट ट्रेन प्रकल्पामुळे या दोन प्रमुख शहरांदरम्यानचा प्रवास अवघ्या ४८ मिनिटांत पूर्ण होण्याची शक्यता व्यक्त करण्यात आली आहे. तसेच पुणे-हैदराबाद मार्गावर प्रवासाचा कालावधी सुमारे दोन तासांपर्यंत मर्यादित राहील, असा अंदाज आहे. या दोन्ही प्रकल्पांमुळे औद्योगिक आणि आयटी क्षेत्राला चालना मिळण्याबरोबरच प्रवास अधिक सुलभ होणार आहे, अशी माहिती रेल्वेमंत्री अश्विनी वैष्णव यांनी संसदेत दिली.
मुंबई-पुणे मार्गाला प्राधान्य
केंद्र सरकारच्या बुलेट ट्रेन योजनेत मुंबई–पुणे मार्गाला विशेष महत्त्व देण्यात आले आहे. या प्रकल्पामुळे दोन शहरांमधील प्रवास केवळ ४८ मिनिटांत पूर्ण होऊ शकतो. औद्योगिक आणि व्यावसायिक दृष्ट्या महत्त्वाच्या या मार्गामुळे प्रवास जलद आणि सोयीस्कर होणार आहे.
पुणे-हैदराबाद प्रवास होणार जलद
पुणे-हैदराबाद बुलेट ट्रेन मार्गावर प्रवासाचा कालावधी सुमारे दोन तासांपर्यंत मर्यादित राहील, असा अंदाज आहे. आयटी आणि उद्योग क्षेत्रासाठी हा मार्ग महत्त्वाचा ठरणार असून, दोन्ही शहरांमधील आर्थिक आणि व्यावसायिक संबंध अधिक बळकट होतील. ही माहिती अश्विनी वैष्णव यांनी संसदेत दिली.
उपनगरीय रेल्वेला मोठे अनुदान
मुंबई उपनगरीय रेल्वे सेवांसाठी केंद्र सरकारकडून दरवर्षी सुमारे ३,००० कोटी रुपयांचे अनुदान दिले जाते. यामुळे लाखो प्रवाशांना परवडणाऱ्या दरात प्रवास करता येतो. प्रवाशांच्या सुरक्षेसाठी २३८ नवीन स्वयंचलित दरवाजे असलेल्या गाड्यांची निर्मिती सुरू आहे. तसेच मुंबई आणि पुण्यासह ४८ शहरांमध्ये रेल्वे सुविधांचा विस्तार सुरू आहे.
बुलेट ट्रेन प्रकल्पाची प्रगती
बुलेट ट्रेन प्रकल्पांतर्गत भारतातील पहिल्या समुद्राखालील बोगद्याचे काम वेगाने सुरू आहे. एकूण २१ किलोमीटर लांबीच्या सात बोगद्यांपैकी पाच किलोमीटरचे काम पूर्ण झाले आहे. दोन बोगद्यांचे ब्रेकथ्रू यशस्वी झाले आहेत. याशिवाय पायाभरणी, खांब उभारणी, रेल्वे रुळ टाकणे आणि ओव्हरहेड इलेक्ट्रिक कामातही मोठी प्रगती झाली आहे. १७ नद्यांवर पूल बांधण्याचे काम सुरू आहे.
स्थानक आधुनिकीकरणावर भर
देशभरातील १,३०० रेल्वे स्थानकांच्या पुनर्विकासाचे काम सुरू असून, त्यापैकी १८० स्थानके पूर्ण झाली आहेत. सुमारे ५०० स्थानके अंतिम टप्प्यात आहेत. उर्वरित स्थानकांवरही वेगाने काम सुरू असून, प्रवास अधिक सुरक्षित, आधुनिक आणि सोयीस्कर करण्यावर सरकारचा भर आहे.
