नागपूर : नागपुरातील अजनी रेल्वे पुलावर एका तरुणीने उडी मारण्याचा प्रयत्न केला. वेळीच धाडसी युवकाने शिताफीने तरूणीला पकडल्याने मोठा अनर्थ टळला. हा प्रकार बघणाऱ्यांच्या ह्रदयाचे ठोके वाढले होते. या घटनेचा व्हिडिओ समाज माध्यमांवर व्हायरल झाला आहे. या घटनेबाबत आपण जाणून घेऊ या.
नागपूर शहरात एका थरारक आणि हृदयाचा ठोका चुकवणाऱ्या घटनेचा व्हिडीओ सध्या सोशल मीडियावर वेगाने व्हायरल होत आहे. शहरातील अजनी रेल्वे पूल येथे घडलेल्या या घटनेत एका तरुणीने आत्महत्येचा प्रयत्न केल्याची माहिती समोर आली असून काही सतर्क युवकांनी प्रसंगावधान दाखवत तिचा जीव वाचवला.
पोलीस सुत्रांच्या माहितीनुसार, संबंधित तरुणी अजनी रेल्वे पुलाच्या कठड्यावर बसून खाली उडी मारण्याच्या तयारीत होती. पुलाच्या खाली धावणाऱ्या रेल्वे गाड्या आणि वरून सुरू असलेली वाहनांची वर्दळ यामुळे परिस्थिती अत्यंत धोकादायक बनली होती. कोणत्याही क्षणी मोठी दुर्घटना घडण्याची शक्यता निर्माण झाली होती.
मोठी दुर्घटना टळली
दरम्यान, परिसरात उपस्थित असलेल्या काही युवकांच्या लक्षात ही बाब आली. परिस्थितीची गंभीरता ओळखत त्यांनी वेळ न दवडता पुढाकार घेतला. या युवकांपैकी एकाने अत्यंत धाडस आणि चातुर्य दाखवत मागून जाऊन त्या तरुणीला घट्ट पकडले. अचानक घडलेल्या या हालचालीमुळे तरुणीचा तोल जाऊ नये, याची काळजी घेत तिला सुरक्षितपणे पुलाच्या भिंतीवरून खाली उतरवण्यात आले. या युवकाच्या धैर्यशील कृतीमुळे एक संभाव्य मोठी दुर्घटना टळली असून उपस्थितांनी सुटकेचा निश्वास सोडला. या संपूर्ण घटनेचा व्हिडीओ काही क्षणांतच सोशल मीडियावर व्हायरल झाला आणि संबंधित युवकाचे सर्वत्र कौतुक होत आहे.
