Nagpur News Updates : नागपूर आणि विदर्भातील विविध घडामोडींची माहिती एका क्लिकवर…

चंद्रपूर : काँग्रेसच्या राष्ट्रीय नेत्या खासदार सोनिया गांधी, लोकसभेचे विरोधी पक्षनेते खासदार राहुल गांधी व काँग्रेसच्या जेष्ठ नेत्यांविरुद्ध सत्तेचा दुरुपयोग करून केंद्रातील मोदी सरकार आकसपूर्ण कारवाई करीत आहे. मोदी सरकारचा हा निर्णय लोकशाही परंपरेला घातक आहे. लोकसभेत प्रबळ विरोधी पक्षाची भूमिका बजावणाऱ्यांवर सुडबुद्धीने कारवाई करुन जनसामान्यांचा आवाज दडपण्याचा हा डाव आहे, असा आरोप करीत अखिल भारतीय राष्ट्रीय काँग्रेस पक्षाच्या आदेशावरून चंद्रपूर येथे जिल्हा व शहर काँग्रेसच्या वतीने जिल्हाधिकारी कार्यालयासमोर निदर्शने करून विरोध नोंदविण्यात आला.

यावेळी जिल्हाधिकारी यांच्यामार्फत राष्ट्रपती द्रौपदी मुर्मू यांना निवेदन देण्यात आले व चंद्रपूर जिल्हातील जनसामान्या नागरिक व कार्यकर्ते यांची न्याय्य मागणी लक्षात घेऊन सदर नेत्यांवरील कारवाई थांबविण्यात यावी अशी विनंती करण्यात आली. या आंदोलनात ग्रामीण युवक काँग्रेसकडून निषेध व्यक्त करत मोदी सरकार विरोधात फलक दाखविण्यात आले.