काँग्रेस निरीक्षकांच्या भेटीच्या यादीत भाजपमधून आलेल्यांचीच नावे? पक्ष कार्यकर्त्यांची उपेक्षा

निवडकांनाच प्रवेश?

नागपूर शहर काँग्रेसमध्ये संघटन सृजन अभियानाच्या पार्श्वभूमीवर अंतर्गत वाद पुन्हा उफाळून आला आहे. माजी नगरसेवक कमलेश चौधरी यांनी पत्रकार परिषदेत सांगितले की, निरीक्षकांशी संवादासाठी तयार करण्यात आलेल्या यादीतील फक्त १४४ जणांनाच प्रवेश देण्यात आला. या प्रक्रियेत अनेक अनुभवी कार्यकर्ते, माजी नगरसेवक आणि पदाधिकारी यांना जाणीवपूर्वक वगळण्यात आल्याचा आरोप  केला. रविभवन येथे झालेल्या बैठकीदरम्यान काही कार्यकर्त्यांशी गैरवर्तन व शिवीगाळ झाल्याचाही त्यांनी दावा केला. त्यामुळे पक्षातील वातावरण अधिकच तणावपूर्ण झाले आहे.

भाजपमधून आलेल्यांना संधी?

चौधरी यांनी आरोप केला की, भाजपमधून काँग्रेसमध्ये आलेल्या काही व्यक्तींना निरीक्षकांशी भेटण्याची संधी दिली जात आहे, तर वर्षानुवर्षे पक्षासाठी काम करणाऱ्या कार्यकर्त्यांना डावलले जात आहे. “ही बाब अन्यायकारक असून पक्षातील जुन्या कार्यकर्त्यांचा अपमान आहे,” असे ते म्हणाले. या प्रकारामुळे निष्ठावान कार्यकर्त्यांमध्ये नाराजी वाढत असून, संघटन सृजन अभियानाचा मूळ हेतूच बाधित होत असल्याचे त्यांनी स्पष्ट केले. या पार्श्वभूमीवर काँग्रेसमधील गटबाजी उघडपणे समोर येत असल्याचे दिसते.

निरीक्षकांची भूमिका

संघटन बळकटीकरण आणि नव्या शहराध्यक्ष निवडीच्या दृष्टीने काँग्रेसने हे विशेष अभियान सुरू केले आहे. यासाठी निरीक्षक म्हणून अरुण यादव, तर सहनिरीक्षक म्हणून झिया पटेल आणि अशोक बोबडे यांची नियुक्ती करण्यात आली आहे. ते विविध विधानसभा मतदारसंघांतील कार्यकर्ते, पदाधिकारी आणि सामाजिक संस्थांच्या प्रतिनिधींशी संवाद साधून संघटन मजबूत करण्यासाठी अहवाल तयार करणार आहेत. मात्र, स्थानिक पातळीवरील काही पदाधिकारीच निरीक्षकांपर्यंत कोण पोहोचणार हे ठरवत असल्याने पारदर्शकतेवर प्रश्न उपस्थित होत आहेत.

गटबाजी उघड

दरम्यान, विद्यमान शहराध्यक्ष आमदार विकास ठाकरे यांच्या गटाकडून पक्षविरोधी कारवायांमध्ये सहभागी झालेल्या व्यक्तींना या प्रक्रियेत सहभागी करून घेऊ नये, अशी मागणी करण्यात आली आहे. महापालिका निवडणूक अपक्ष म्हणून लढवणाऱ्यांवर कारवाई न करता निष्ठावान माजी नगरसेवकांना दूर ठेवणे म्हणजे पक्षाचे खच्चीकरण असल्याचा आरोपही करण्यात आला. या सर्व घडामोडींमुळे निरीक्षकांच्या दौऱ्यादरम्यान काँग्रेसमधील अंतर्गत मतभेद अधिक स्पष्टपणे समोर येत असून, आगामी शहराध्यक्ष निवडीवर त्याचा परिणाम होण्याची शक्यता व्यक्त केली जात आहे.