बारावी निकाल: २४३ विद्यार्थ्यांनी लिहली एकसारखी उत्तरे, कसा उघडकीस आला सामूहिक कॉपीचा प्रकार?

काय आहे नेमके प्रकरण?

गोंदिया जिल्ह्यातील माउली कनिष्ठ महाविद्यालय कोदुर्ली या शाळेमध्ये जीवशास्त्र विषयाच्या पेपरमध्ये एकसारखी उत्तरे लिहली. या शाळेतील १२५ विद्यार्थ्यांचा यामध्ये समावेश होता. अशाच प्रकारे वर्धा जिल्ह्यातील समुद्रपूर तालुक्यातील जे.डी. चौधरी शाळा वाशी येथेही असाच प्रकार घडला. येथील ११८ विद्यार्थ्यांनी जीवशास्त्र विषयाचा पेपर एकसारखा लिहला. उत्तर पत्रिका तपासताना नियमकाच्या लक्षात ही बाब आली. त्यानंतर त्यांनी शिक्षण मंडळाकडे यासंदर्भात तक्रार केली. यानंतर संपूर्ण प्रक्रियेचा तपास करण्यात आला. यासाठी विद्यार्थ्यांनाही बोर्डामध्ये बोलावण्यात आले होते. त्यानंतर सर्व चौकशी केली असता सामूहिक कॉपी झाल्याचा निष्कर्ष निघाला. यामुळे शिक्षण मंडळाने एकूण २४३ विद्यार्थ्यांना अनुत्तीर्ण केले.

शिक्षक, मुख्यध्यापक, संस्थेवरही कारवाई

या संपूर्ण प्रकरणाची माहिती देताना शिक्षण मंडळाचे विभागीय अध्यक्ष शिवलिंग पटवे यांनी सांगितले की, या प्रकरणात विद्यार्थ्यांना अनुत्तीर्ण करण्यात आले असून या दोन्ही शाळेतील परीक्षा केंद्र नेहमीसाठी रद्द करण्यात आले आहे. याशिवाय या प्रकरणात कॉपी करण्यास मदत करणाऱ्या शिक्षकांवरही कठोर कारवाई होणार आहे. त्यांची चौकशी सुरू आहे. यासोबतच शाळेचे मुख्याध्यापक आणि संस्थेवरही कारवाई केली जाणार, असेही पटवे यांनी सांगितले.

किती विद्यार्थी उत्तीर्ण झाले

यामध्ये नागपूर विभागातून १ लाख ५३ हजार २५६ नियमित विद्यार्थ्यांनी नोंदणी केली होती. त्यापैकी १ लाख ५२ हजार २३० विद्यार्थ्यांनी परीक्षा दिली. त्यापैकी १ लाख ३४ हजार ९८८ विद्यार्थी उत्तीर्ण झाले. त्यांची टक्केवारी ८८.६७ इतकी आहे. करोना काळात नागपूर विभागाच्या निकालाची टक्केवारी ही ९७ टक्क्यांपर्यंत गेली होती. मात्र, चार वर्षांपासून या सवलती बंद होताच निकालात घसरण झाली आहे. नागपूर विभागनिहाय विचार केल्यास गोंदिया जिल्ह्याचा निकाल सर्वाधिक असतो.