‘मोबाईल, टीव्ही’वर ‘स्क्रीन टाईम’ अधिक, अपस्मारचा धोका… तज्ज्ञ डॉक्टर म्हणतात…

नागपुरातील मेडिकल रुग्णालयात झालेल्या पत्रपरिषदेत संघटनेचे अध्यक्ष डाॅ. वसंत डांगरा म्हणाले, ‘स्क्रीन टाईम’ जास्त असलेल्या व्यक्तीच्या झोपेवर परिणाम होतो. त्यामुळे त्याची झोपेची सायकल विस्कळीत होते. परिणामी मिरगीचा आजार असला तरी त्याबाबत लक्षणे नसलेल्यांना अचानक आपस्मारचे झटके येण्याचा धोका वाढतो. भारतात सर्व वयोगटात अपस्मारचे रुग्ण आढळत असल्याचेही डाॅ. डांगरा यांनी सांगितले. सचिव डाॅ. अमरजीत वाघ म्हणाले, भारतात प्रत्येक एक लाख लोकांमागे ५ ते ७ जणांमध्ये अपस्मार आढळतो. नागपुरातही जवळपास हे प्रमाण सारखे आहे. या आजाराचा अनुवांशिक, अपघात, मेंदूत संक्रमण, प्राथमिक आरोग्य केंद्रात विलंबाने प्रसूतीसह इतरही काही कारणे आहेत.

अपस्मारचे वेळीच निदान करून योग्य उपचार झाल्यास अनेक जण बरे होऊ शकतात. या आजाराबाबत रुग्णांसोबतच पालकांमध्येेही जनजागृतीची गरज आहे. जेणेकरून त्यांना रुग्णाला अपस्मारचे झटके येताच तातडीने त्यावर उपाय करणे शक्य होईल, असेही वाघ यांनी सांगितले. डाॅ. अविनाश गावंडे म्हणाले, शाळेतील शिक्षकांसह इतरही कर्मचाऱ्यांना अपस्माराचे झटके आल्यास काय करावे? याबाबत माहिती गरजेची आहे. मुलाला कधी शाळेत अपस्मारचे झटके आल्यास शिक्षक व इतर कर्मचारी त्यावर उपाय करू शकतील, असेही डाॅ. गावंडे म्हणाले. पत्रपरिषदेला डाॅ. आशीष कुथे उपस्थित होते.

असोसिएशनचे पदग्रहण उद्या

नागपूर एपिलेप्सी असोसिएशनच्या नवीन पदाधिकाऱ्यांचा पदग्रहण समारंभ रविवारी सकाळी ९.३० वाजता नागपुरातील मेडिकल रुग्णालयातील सभागृहात आयोजित केला गेला आहे. त्यात अध्यक्ष म्हणून डाॅ. वसंत डांगरा, सचिव म्हणून डाॅ. अमरजीत वाघ यांच्यासह डाॅ. नीरज बहेटी, डाॅ. विनीत वानखेडे, डाॅ. अक्षय पाटील, डाॅ. चाणक्य पाटील, डाॅ. नेहा सलांकर, डाॅ. प्रफुल्ल शेंबालकर, डाॅ. संजय रामटेके, डाॅ. सुशील गावंडे, डाॅ. अभिजित सोमाणी आणि इतरही सदस्य विविध पदाची जबाबदारी सांभाळतील. समारंभाला प्रमुख अतिथी म्हणून पद्मश्री डाॅ. चंद्रशेखर मेश्राम, मानसोपचार तज्ज्ञ डाॅ. सुधीर भावे, मेडिकलचे अधिष्ठाता डाॅ. राज गजभिये, वैद्यकीय अधीक्षक डाॅ. अविनाश गावंडे उपस्थित राहतील.