नागपूर-गोवा एक्स्प्रेस लोकार्पणाच्या दिवशी नियोजित वेळेपूर्वीच सुटली

नागपूर-मडगाव (गोवा) एक्सप्रेसची नागपूरहून सुटण्याची वेळ दुपारी नियोजित होती. मात्र, लोकार्पणाच्या दिवशी या गाडीच्या वेळापत्रकात बदल झाल्याचे पाहायला मिळाले. ही गाडी नियोजित वेळेनुसार दुपारी ३.५ वाजता सुटणे अपेक्षित असताना ती दुपारी ३ वाजता सोडण्यात आली, अशी माहिती समोर आली आहे. भारतीय रेल्वेच्या नियमानुसार गाड्या वेळेवर किंवा काही तांत्रिक अथवा ऑपरेशनल कारणांमुळे विलंबाने सुटू शकतात, परंतु नियोजित वेळेपेक्षा आधी गाडी सोडणे सामान्यतः अपेक्षित नसते. कारण प्रवाशांच्या सोयीसाठी वेळापत्रक काटेकोरपणे पाळले जाते. अशा परिस्थितीत वेळेतील बदल हा चर्चेचा विषय ठरला आहे. शनिवारी केंद्रीय मंत्री नितीन गडकरी यांच्या हस्ते या नागपूर-मडगाव (गोवा) एक्सप्रेसचे लोकार्पण करण्यात आले.

विदर्भ आणि कोकणाला जोडणाऱ्या नागपूर-मडगाव विशेष रेल्वेगाडीला आता नियमित एक्सप्रेसचा दर्जा मिळाला आहे. अनेक वर्षांच्या मागणीनंतर रेल्वे बोर्डाने या सेवेला मंजुरी देत ०११३९/०११४० या विशेष गाडीचे नियमितीकरण केले असून आता ही गाडी ११२०३/११२०४ नागपूर-मडगाव एक्सप्रेस या क्रमांकाने धावणार आहे. या निर्णयामुळे विदर्भ आणि गोवा यांच्यातील रेल्वे संपर्क अधिक मजबूत होणार असून प्रवाशांना अधिक नियोजित आणि स्थिर सेवा उपलब्ध होणार आहे.

नवीन वेळापत्रकानुसार, ही गाडी नागपूरहून दर बुधवारी आणि शनिवारी दुपारी ३.०५ वाजता सुटेल. मडगावहून ती गुरुवारी आणि रविवारी सायंकाळी ८ वाजता प्रस्थान करेल. परतीच्या प्रवासात ही गाडी सोमवारी आणि शुक्रवारी रात्री ९.३० वाजता नागपूरला पोहोचेल. प्रवाशांच्या सुविधेसाठी ‘रोहा’ स्थानकावर दोन्ही दिशांनी अतिरिक्त थांबा देण्यात आला आहे. तसेच वर्धा, अकोला, भुसावळ, नाशिक रोड, कल्याण, पनवेल, रत्नागिरी, कणकवली, सावंतवाडी रोड, थिवीम आणि करमाळी यांसह सुमारे २४ प्रमुख स्थानकांवर या गाडीला थांबे देण्यात आले आहेत.

१३० टक्के प्रतिसाद; दररोज सेवेचा विचार : नितीन गडकरी

नागपूर-मडगाव एक्सप्रेसला प्रवाशांकडून तब्बल १३० टक्के प्रतिसाद मिळत असून भविष्यात ही गाडी आठवड्यातून दोन दिवसांऐवजी दररोज धावण्याबाबत रेल्वे प्रशासन सकारात्मक विचार करू शकते, असे संकेत केंद्रीय मंत्री नितीन गडकरी यांनी दिले. सध्या आठवड्यातून दोन दिवस धावणाऱ्या या गाडीला अपेक्षेपेक्षा अधिक प्रतिसाद मिळत असून ऑक्युपन्सी तब्बल १३० टक्क्यांपर्यंत पोहोचली आहे. भविष्यात प्रवाशांचा असाच प्रतिसाद कायम राहिल्यास ही सेवा दररोज सुरू करण्याबाबत रेल्वे प्रशासन निश्चितच सकारात्मक निर्णय घेऊ शकते.