नागपूर: महाल भागात पुन्हा सशस्त्र तरुणांचा धुमाकूळ; गाड्यांची तोडफोड

या प्रकाराने दहशत निर्माण झाली आहे. हातात तलवारसदृश शस्त्रे घेत आरोपी रस्त्यांवरून फिरले व महालातील डझनाहून अधिक वाहने फोडली. या प्रकरणाची माहिती मिळताच पोलीस अधिकारी व कर्मचारी घटनास्थळी पोहोचले.

सूत्रांनी दिलेल्या माहितीनुसार महालातील शिवाजी पुतळा चौकाकडून राम कूलर्स चौकाकडे जाणारा मार्ग व आतील भागांत हा प्रकार घडला. सुमारे १२ ते १५ अज्ञात तरुण हातात शस्त्रे घेऊन शिवीगाळ करत रस्त्यावरून जात होते. जोहरीपुऱ्याकडून ते राम कूलर चौकाकडे गेले. त्यांनी परिसरातील मार्गांवर उभ्या वाहनांची तोडफोड केली. प्रत्यक्षदर्शींनी दिलेल्या माहितीनुसार जवळपास डझनाहून अधिक वाहने फोडण्यात आली. परिसरातील लोकांनी तातडीने याची माहिती पोलिसांना दिली.

कोतवाली पोलीस ठाण्याचे पथक घटनास्थळी पोहोचले. सोबतच उपायुक्त राहुल मदने हेदेखील तेथे पोहोचले. महालातील विविध भागात पोलीस बंदोबस्त तैनात करण्यात आला व आरोपींच्या शोधाला सुरुवात झाली. पोलिसांनी तीन तरुणांना ताब्यात घेतले असून मध्यरात्रीनंतर त्यांची चौकशी सुरू होती. ही तीनही मुले महालच्या बाहेरील परिसरातील असल्याची माहिती आहे.

मागील मार्च महिन्यात महालात दंगल व हिंसाचार उसळला होता. त्यानंतर शिवाजी पुतळा चौकात कडेकोट पोलीस बंदोबस्त तैनात होता. मात्र काही दिवसांपासून तेथील बंदोबस्तात काहीशी शिथिलता आल्याची नागरिकांची तक्रार आहे. राष्ट्रपतींच्या दौऱ्यामुळे शहरात कडेकोट बंदोबस्त तैनात आहे. मात्र तरीदेखील संवेदनशील भागात असा प्रकार घडल्याने पोलीस यंत्रणेवर प्रश्नचिन्ह उपस्थित होत आहेत.