नागपूर : बालविवाहासाठी मध्यप्रदेशात नेले जात असताना एका अल्पवयीन मुलीने दाखवलेल्या प्रसंगावधानामुळे मोठा अनर्थ टळला. रामपुरी फाटा येथे वाहन थांबवण्याचा बहाणा करून तिने आईलाच जाब विचारला. त्यातून झालेला वाद पाहून केळवद पोलिसांनी हस्तक्षेप केला. मुलीने संपूर्ण प्रकार सांगताच तिची सुखरूप सुटका करण्यात आली. या प्रकरणात सहा जणांना अटक झाली असून आणखी दोघांना ताब्यात घेण्यात आले आहे.
नेमके काय घडले?
पोलिसांच्या माहितीनुसार, पीडित अल्पवयीन मुलीच्या आईचे नागपूरातील वकील नाझीर शेख याच्याशी प्रेमसंबंध होते. त्याने आई आणि मुलीला नागपुरात बोलावले. तेथे ‘खाला’ म्हणून ओळखल्या जाणाऱ्या एका महिलेची भेट घडवून आणण्यात आली. त्यानंतर आई, तिचा प्रियकर आणि इतर साथीदारांनी संगनमत करून अल्पवयीन मुलीचा मध्यप्रदेशातील एका व्यक्तीशी विवाह लावून दिला. त्यानंतर तिला मध्यप्रदेशात घेऊन जाण्याची तयारी सुरू होती.
मुलीने स्वतःचा बचाव कसा केला?
१७ जुलै रोजी केळवद पोलीस ठाण्याच्या हद्दीतील रामपुरी फाटा येथे जात असताना मुलीने प्रसंगावधान राखत वाहन थांबवण्याचा बहाणा केला. वाहन थांबताच तिने आईला जाब विचारला. दोघींमध्ये वाद सुरू झाल्याने जवळच असलेल्या केळवद पोलिसांचे लक्ष या प्रकाराकडे गेले.
पोलिसांनी काय कारवाई केली?
वादाचे कारण विचारल्यानंतर मुलीने पोलिसांना संपूर्ण प्रकार सांगितला. बालविवाह झाल्याचे आणि तिला जबरदस्तीने मध्यप्रदेशात नेले जात असल्याचे समजताच पोलिसांनी तातडीने हस्तक्षेप करून मुलीची सुरक्षित सुटका केली. त्यानंतर या प्रकरणात गुन्हा दाखल करण्यात आला.
कोणत्या कलमांखाली गुन्हा दाखल झाला?
या प्रकरणी भारतीय न्याय संहितेचे कलम १४३, ३(५) तसेच बालविवाह प्रतिबंधक कायद्यातील कलम ३, ९ आणि १० अन्वये गुन्हा नोंदविण्यात आला आहे.
कोणकोणत्या आरोपींना अटक झाली?
या प्रकरणात राजेश गणपत बच्छांगी (४३), रवि रामप्रसाद यादव (२५), रामप्रसाद नंदराम यादव (५३), संजय रतन परमार (५०), दुल्हेसिंग गजबसिंग कच्छवा (४३) हे सर्व मध्यप्रदेशातील रहिवासी तसेच पीडितेची आई यांना अटक करण्यात आली आहे.
आणखी कोण ताब्यात आहे?
या प्रकरणात आणखी एका महिलेला आणि नागपूरातील वकील नाझीर शेख याला ताब्यात घेण्यात आले असून त्यांच्या अटकेची प्रक्रिया सुरू आहे.
ही कारवाई कोणाच्या मार्गदर्शनाखाली झाली?
वरिष्ठ पोलीस अधीक्षक हर्ष ए. पोद्दार, अपर पोलीस अधीक्षक अनिल म्हस्के आणि सहाय्यक पोलीस अधीक्षक तथा उपविभागीय पोलीस अधिकारी सागर खर्डे यांच्या मार्गदर्शनाखाली केळवद पोलिसांनी ही कारवाई केली. पुढील तपास केळवद पोलीस करीत आहेत.
