नागपूर : गोमाता हिंदू-मुस्लिम संस्कृतीला जोडणारा दुवा असून तिला राष्ट्रीय पशूचा दर्जा मिळावा, या मागणीसाठी मंगळवारी, नागपुरातील संविधान चौकात मुस्लिम समाजाच्या शवतीने अनोखे आणि शांततापूर्ण आंदोलन करण्यात आले. आंदोलनानंतर जिल्हाधिकाऱ्यांना प्रत्यक्ष गाय भेट देऊन निवेदन सोपवण्यात आले.

संविधान चौकात अनोखा एल्गार

नागपूरच्या ऐतिहासिक संविधान चौकात आज मुस्लिम समाजातील नागरिक आणि विविध सामाजिक संघटनांचे प्रतिनिधी अतिशय मोठ्या संख्येने एकत्र आले होते. एरवी राजकीय पक्षांच्या आंदोलनांनी किंवा निषेधाच्या घोषणांनी गाजणाऱ्या या चौकात आजचे चित्र मात्र पूर्णपणे वेगळे, शांतताप्रिय आणि संपूर्ण समाजाला एकतेचा तसेच सामाजिक सलोख्याचा नवा संदेश देणारे ठरले. ‘गोमाता को राष्ट्रीय पशु घोषित करो’ अशा आशयाचे फलक व बॅनर्स हातात धरून उपस्थित मुस्लिम बांधवांनी या राष्ट्रीय मागणीला आपला जाहीर आणि खंबीर पाठिंबा दर्शवला.

या अभिनव आंदोलनाचे मुख्य वैशिष्ट्य म्हणजे, मुस्लिम समाजाने केवळ कोरडी घोषणाबाजी न करता भारतीय संस्कृती आणि परंपरेमध्ये गायीचे असलेले सर्वोच्च धार्मिक, आध्यात्मिक आणि आर्थिक महत्त्व अतिशय प्रभावीपणे अधोरेखित केले.

हेही वाचा

जिल्हाधिकाऱ्यांना प्रत्यक्ष ‘गोमाता’ भेट

संविधान चौकातील हे शांततापूर्ण आंदोलन संपल्यानंतर मुस्लिम समाजाच्या प्रमुख प्रतिनिधींच्या एका शिष्टमंडळाने आपला मोर्चा जिल्हाधिकारी कार्यालयाकडे वळवला. या आंदोलनाचे मुख्य आकर्षण म्हणजे आंदोलकांनी आपल्यासोबत एक गाय आणली होती. जिल्हाधिकारी कार्यालयात पोहोचून शिष्टमंडळाने जिल्हाधिकाऱ्यांची प्रत्यक्ष भेट घेतली आणि त्यांना ही गाय (गोमाता) सप्रेम भेट म्हणून सुपूर्द केली.

सामाजिक सलोख्याचा नवा संदेश

या प्रसंगी मुस्लिम समाजाच्या प्रमुखांनी माध्यमांशी सविस्तर बोलताना सांगितले की, भारतासारख्या विविधतेने नटलेल्या देशात सर्वधर्मीय बांधव शतकानुशतके गुण्यागोविंदाने आणि बंधुभावाने राहत आहेत. गायीला राष्ट्रीय पशूचा अधिकृत दर्जा मिळाल्यास देशातील गोवंशाची होणारी हत्या पूर्णपणे थांबेल आणि मुक्या प्राण्यांबद्दलची क्रूरता कमी होईल. या राष्ट्रीय मागणीमुळे देशातील बहुसंख्य हिंदू समाजाच्या धार्मिक भावनांचा आदर तर होईलच, शिवाय हिंदू आणि मुस्लिम या दोन्ही समाजघटकांमधील परस्पर स्नेह, बंधुभाव आणि सामाजिक सलोखा भविष्यात अधिक दृढ होण्यास मोठी मदत होणार आहे.

नागपूरच्या जिल्हाधिकाऱ्यांनी शिष्टमंडळाचे हे विस्तृत निवेदन अत्यंत सकारात्मकतेने स्वीकारले. तसेच, आंदोलकांच्या या भावना आणि राष्ट्रीय पशू घोषित करण्याची मागणी योग्य कायदेशीर माध्यमातून केंद्र सरकारपर्यंत तातडीने पोहोचवण्याचे आश्वासन दिले.