विश्वास नांगरे-पाटील नागपुरात रूज होताच शिष्टमंडळाची पोलीस मुख्यालयात धाव

नागपूरचे नवनियुक्त पोलीस आयुक्त विश्वास नांगरे-पाटील यांनी सामाजिक माध्यमांवरील एका विधानात राष्ट्रीय स्वयंसेवक संघ (आरएसएस) संदर्भात केलेल्या उल्लेखामुळे निर्माण झालेल्या चर्चेच्या पार्श्वभूमीवर विविध राजकीय व सामाजिक संघटनांनी चिंता व्यक्त केली आहे. या मुद्द्यावर स्पष्टीकरण मिळावे, अशी मागणी करत विविध पक्षांच्या प्रतिनिधींनी पोलीस आयुक्तांची भेट घेऊन निवेदन दिले. पोलीस प्रशासनाने संविधानाच्या चौकटीत राहून निष्पक्षपणे कार्य करावे आणि सर्व समाजघटकांमध्ये विश्वास टिकवावा, अशी अपेक्षा या निवेदनात व्यक्त करण्यात आली.

संविधानिक निष्पक्षतेवर भर

निवेदनात पोलीस यंत्रणा ही सर्व धर्म, जाती-जमाती आणि सामाजिक घटकांना समान न्याय व संरक्षण देणारी असावी, असे स्पष्ट करण्यात आले. प्रशासन कोणत्याही राजकीय, सामाजिक किंवा वैचारिक प्रभावापासून अलिप्त राहून केवळ कायदा व संविधानाच्या आधारे कार्य करणे अपेक्षित असल्याचेही नमूद करण्यात आले.

चार प्रमुख मुद्द्यांवर स्पष्टीकरणाची मागणी

शिष्टमंडळाने सादर केलेल्या निवेदनात चार महत्त्वाच्या मुद्द्यांवर पोलीस आयुक्तांनी स्पष्ट भूमिका मांडावी, अशी मागणी करण्यात आली. त्यामध्ये राष्ट्रीय स्वयंसेवक संघाबाबत वैयक्तिक भूमिका काय आहे, भारतीय संविधान व धर्मनिरपेक्ष मूल्यांबाबत विचार काय आहेत, पोलीस आयुक्त म्हणून सर्व समाजघटकांना समान न्याय व संरक्षण दिले जाईल का, तसेच प्रशासनाची निष्पक्षता नागरिकांमध्ये अधोरेखित करण्यासाठी सार्वजनिक भूमिका स्पष्ट करावी का, यांचा समावेश आहे.

सामाजिक संवेदनशीलतेचा मुद्दा

नागपूर हे सामाजिक आणि वैचारिकदृष्ट्या संवेदनशील शहर असल्याने पोलीस प्रशासनावरील विश्वास अबाधित राहणे अत्यंत आवश्यक आहे, असेही निवेदनात म्हटले आहे. वरिष्ठ अधिकाऱ्यांच्या सार्वजनिक विधानांमुळे कोणताही गैरसमज निर्माण होऊ नये, यासाठी स्पष्टता आवश्यक असल्याचे मत मांडण्यात आले.

विविध पक्ष व संघटनांची उपस्थिती

या वेळी शहर काँग्रेसचे अध्यक्ष प्रफुल्ल गुडधे, भारतीय कम्युनिस्ट पक्षाचे डॉ. युगल रायलू, मार्क्सवादी कम्युनिस्ट पक्षाचे अरुण लाटकर, भारतीय कम्युनिस्ट पक्षाचे ॲड. अनिल काळे, रिपब्लिकन पार्टी ऑफ इंडिया (सेक्युलर)चे दिनेश अंडरसहारे, जय विदर्भ पक्षाचे नरेश निमजे, आम आदमी पक्षाचे जगजीत सिंह, प्रदेश काँग्रेसचे सचिव विजय सरटकर तसेच युवक काँग्रेसचे सुमंत कुन्हेकर यांच्यासह विविध पक्ष व सामाजिक संघटनांचे पदाधिकारी उपस्थित होते.