scorecardresearch

कॅनडातील युवतीला नागपूर पोलिसांची मदत ; ट्विट करून मानले आभार; इंस्टाग्रामवरून केली होती फसवणूक

पैसे मिळताच इंस्टाग्रामवरील दुकानदार महिलेने जीना यांना चक्क ब्लॉक केले.

नागपूर : गुजरातमधील इंस्टाग्रामवरील कापडाच्या जाहिरातीला प्रतिसाद देत कॅनडातील युवतीने खरेदी करीत पैसे भरले. परंतु, त्या आरोपीने पैसे घेतल्यानंतर तिची फसवणूक केली. त्यामुळे तिने कॅनडातून नागपूर पोलिसांना ट्विट करीत तक्रार मांडली. नागपूर सायबर पोलिसांनी लगेच प्रतिसाद देत आरोपीकडून तिला पैसे परत मिळवून दिले. त्या युवतीने ट्विट करून नागपूर पोलिसांचे आभार मानले.

कॅनडातील जीना वर्गीस या युवतीला इंस्टाग्रामवर भारतातील कपडय़ांची जाहिरात दिसली. त्यामुळे तिने बरीच खरेदी केली आणि दुकानदाराच्या खात्यात पैसेही पाठवले. पैसे मिळताच इंस्टाग्रामवरील दुकानदार महिलेने जीना यांना चक्क ब्लॉक केले. त्यामुळे जीनाने इंस्टाग्रामवर दिलेल्या जाहिरातीतील भ्रमणध्वनी क्रमांकावर संपर्क साधला, परंतु तिला प्रतिसाद मिळाला नाही. त्यामुळे फसवणूक झाल्याचे तिच्या लक्षात आले. तिने शेवटचा पर्याय म्हणून नागपूर पोलिसांना ट्विट करून मदत मागितली. पोलीस उपायुक्त चेतना तिडके आणि पोलीस अधिकारी केशव वाघ यांनी लगेच तक्रारीची दखल घेतली.

नागपुरातील ज्या बँक खात्यात पैसे वळते झाले होते, त्याची माहिती काढली. संबंधित व्यक्तीने गुजरातमध्ये राहणाऱ्या विवाहित मुलीने फसवणूक केल्याची कबुली दिली. वडिलाने तिच्या मुलीशी संपर्क साधून लुबाडलेले पैसे परत करण्यास बाध्य केले. जीना वर्गीस हिच्या खात्यात पैसे येताच तिने नागपूर सायबर पोलिसांचे ट्विटरवरून आभार मानले.

मराठीतील सर्व नागपूर ( Nagpur ) बातम्या वाचा. मराठी ताज्या बातम्या (Latest Marathi News) वाचण्यासाठी डाउनलोड करा लोकसत्ताचं Marathi News App.

Web Title: Nagpur police help canadian girl zws

ताज्या बातम्या