नागपूर : ‘भुरू’वर जीवघेणा हल्ला; कुख्यात ‘शरीफ टोळी’वर अखेर मकोका! सूत्रधार ‘बाबा टायगर’ फरारच, पाच जण अटकेत

बाबा टायगरच्या टोळीने ११ ऑगस्ट रोजी सोमलवाडा चौकातील ‘हॉटेल मेमरीज’समोर भुरूला कारखाली चिरडून ठार मारण्याचा प्रयत्न केला होता. सुरुवातीला या घटनेकडे अपघात म्हणून पाहिले गेले. मात्र, गुन्हे शाखेच्या पथक दोनने यातले वास्तव चव्हाट्यावर आणले. जुन्या वैमनस्यातून पूर्वनियोजितरित्या हा हल्ला झाल्याचे तपासात निष्पन्न झाले. त्यानंतर अपघाता एवजी खुनाचा प्रयत्न केल्याचा गुन्हा नोंदवण्यात आला.

हद्दपारीचे आदेश असतानाही शहरात घुसखोरी

कोराडी पोलीस ठाण्याच्या हद्दीत नोव्हेंबर २०२३ मध्ये शेख अशफाक शेख मुश्ताक याची हत्या झाली होती. बाबा टायगर आणि त्याच्या टोळीने हा खून घडवून आणला होता. या टोळीने शेख अशफाक याचे डोके रेल्वे रुळावर आपटून ठेचले होते. पोलिसांच्या नोंदीनुसार, बाबा टायगरने साथीदारांसह गांजाचा साठा लुटण्यासाठी ही टोळी तयार केली होती. त्यामुळ मे महिन्यात तत्कालीन पोलीस उपायुक्त नित्यानंद झा यांनी बाबा टायगरला सहा महिन्यांसाठी हद्दपार केले होते. सहा महिन्यांसाठी जिल्ह्याच्या हद्दीत प्रवेशास मनाई असतानाही त्याने शहरात घुसखोरी करत भूरूवर जीवघेणा हल्ला घडवून आणला होता.

गुन्हे शाखेच्या तपासात अनेक बाबींचा उलगडा

पोलिसांच्या नोंदी नुसार गांजाच्या बेकायदेशीर विक्रीत गुंतलेले तस्कर माल (गांजा) चोरीला गेल्याची तक्रार करण्यासाठी धजावत नाहीत. त्यामुळे, अशा अनेक घटनांची पोलिसांकडे नोंदच होत नाही. बाबा टायगर आणि त्याच्या साथीदारांनी ही लूट करण्यासाठीच टोळी तयार केली. जुन्या वैमनस्यातून ११ ऑगस्ट रोजी भुरू हा सोमलवाडा चौकातील एका सावजी हॉटेलमध्ये जेवण करण्यासाठी गेला असता टोळीने त्याला कारखाली चिरडण्याचा प्रयत्न केला. यात भुरू गंभीररित्या जखमी झाला असून तो सध्या अतिदक्षता विभागात कृत्रिम श्वासोच्छवासावर मृत्यूशी झुंज देत आहे.