विधानपरिषद निवडणुकीसाठी नागपुरात काँग्रेसच्याच दोन उमेदवारांमध्ये पहिली चुरस, उमेदवारीसाठीही स्पर्धा!

काँग्रेसकडून दोन उमेदवारी अर्ज

नागपूर स्थानिक स्वराज्य संस्था मतदारसंघाच्या विधान परिषद पोटनिवडणुकीसाठी काँग्रेसकडून माजी जिल्हा परिषद सदस्य दिनेश ढोले आणि प्रदेश काँग्रेसचे प्रवक्ते अतुल लोंढे यांनी उमेदवारी अर्ज दाखल केला आहे. पक्षाच्या निर्देशानुसार दोघांनीही अर्ज भरल्याचे सांगितले जात असून, उमेदवारी अर्ज मागे घेण्याच्या मुदतीपूर्वी काँग्रेसकडून अधिकृत उमेदवाराची घोषणा होण्याची शक्यता व्यक्त केली जात आहे. त्यामुळे काँग्रेसच्या अंतिम निर्णयाबाबत कार्यकर्ते आणि राजकीय निरीक्षकांमध्ये उत्सुकता आहे.

बावनकुळे यांच्या राजीनाम्यानंतर पोटनिवडणूक

महसूल मंत्री चंद्रशेखर बावनकुळे हे विधानसभा निवडणुकीत विजयी झाल्यानंतर त्यांनी विधान परिषदेच्या सदस्यत्वाचा राजीनामा दिला होता. त्यानंतर ही जागा रिक्त झाली असून त्यासाठी पोटनिवडणूक होत आहे. या निवडणुकीसाठी भाजपने माजी जिल्हाध्यक्ष डॉ. राजीव पोतदार यांना उमेदवारी दिली आहे. त्यामुळे भाजप आणि काँग्रेस यांच्यात थेट लढत होण्याची चिन्हे आहेत.

बिनविरोध निवडणुकीला काँग्रेसचा विरोध

काँग्रेसने सुरुवातीपासूनच ही निवडणूक बिनविरोध होऊ दिली जाणार नसल्याचे स्पष्ट संकेत दिले होते. त्याचाच भाग म्हणून दोन इच्छुकांकडून उमेदवारी अर्ज दाखल करून पक्षाने निवडणुकीच्या रिंगणात उतरण्याची तयारी दर्शविली आहे. भाजपकडे स्थानिक स्वराज्य संस्थांमधील संख्याबळ अधिक असले तरी काँग्रेसने राजकीय संदेश देण्यासाठी निवडणूक लढविण्याचा निर्धार कायम ठेवला आहे. त्यामुळे ही निवडणूक केवळ संख्याबळाचीच नव्हे तर राजकीय प्रतिष्ठेचीही ठरणार आहे.

४ जूनपर्यंत चित्र स्पष्ट होणार

उमेदवारी अर्ज दाखल करण्याची अंतिम मुदत सोमवारी संपली असून मंगळवारी अर्जांची छाननी होणार आहे. त्यानंतर ४ जूनपर्यंत उमेदवारी अर्ज मागे घेता येणार आहेत. त्यामुळे काँग्रेसकडून अंतिम उमेदवार कोण असेल, याचे चित्र पुढील काही दिवसांत स्पष्ट होणार आहे. दरम्यान, या मतदारसंघात सुमारे ८३६ मतदार असून त्यामध्ये महापालिका, नगरपालिका, नगरपंचायत तसेच इतर स्थानिक स्वराज्य संस्थांतील निवडून आलेले सदस्यांचा समावेश आहे. या जागेसाठी मतदान १८ जून रोजी होणार असून मतमोजणी २२ जूनला करण्यात येणार आहे. त्यामुळे येत्या काही दिवसांत या निवडणुकीच्या राजकीय घडामोडींना वेग येण्याची शक्यता आहे.