नागपूर विधान परिषद निवडणूक: बावनकुळेंचा ‘बिनविरोध’चा डाव केदारांनी उलटवला

बावनकुळेंचा ‘बिनविरोध’चा प्रयत्न फसला

महसूल मंत्री चंद्रशेखर बावनकुळे यांनी नागपूर विधान परिषदेची ही जागा बिनविरोध करण्यासाठी पडद्यामागून राजकीय फिल्डिंग लावली होती. सर्वपक्षीय संमतीने ही निवडणूक बिनविरोध करून महायुतीचे नागपूरवरील वर्चस्व आणि ताकद दाखवण्याचा त्यांचा मानस होता. मात्र, काँग्रेसचे नेते आणि माजी मंत्री सुनील केदार यांनी या दबावापुढे न झुकता कमालीची जिद्द दाखवली. केदार यांच्या आक्रमक पवित्र्यामुळे महायुतीकडून झालेले तडजोडींचे सर्व प्रयत्न निष्फळ ठरले आणि बावनकुळे यांचा बिनविरोधचा प्रयत्न अखेर फसला.

बालेकिल्ल्यात भाजपची यंत्रणा सक्रिय

भाजपचे ज्येष्ठ नेते चंद्रशेखर बावनकुळे यांनी नुकत्याच झालेल्या विधानसभा निवडणुकीत विजय मिळवल्यानंतर आपल्या विधान परिषद सदस्यत्वाचा राजीनामा दिला होता. त्यामुळे रिक्त झालेल्या या जागेसाठी राज्य निवडणूक आयोगाने पोटनिवडणूक जाहीर केली. भाजपने या जागेवर आपले माजी जिल्हाध्यक्ष डॉ. राजीव पोतदार यांना उमेदवारी दिली आहे. स्थानिक स्वराज्य संस्थांमधील संख्याबळ पाहता या निवडणुकीत भाजपचे पारडे सध्या जड मानले जात आहे. तरीही, कोणत्याही प्रकारची जोखीम न पत्करता भाजपने आपला विजय निश्चित करण्यासाठी संपूर्ण संघटनात्मक यंत्रणा ताकदीने मैदानात उतरवली आहे.

काँग्रेसची माघार आणि अंतर्गत समन्वय

दुसरीकडे, काँग्रेसने ही निवडणूक कमालीची प्रतिष्ठेची केली आहे. पक्षाकडून प्रदेश प्रवक्ते अतुल लोंढे आणि माजी जिल्हा परिषद सदस्य दिनेश ढोले या दोघांनीही उमेदवारी अर्ज दाखल केल्यामुळे सुरुवातीला काँग्रेस अंतर्गत समन्वयाचा अभाव असल्याची चर्चा राजकीय वर्तुळात रंगली होती. मात्र, अर्ज मागे घेण्याच्या अंतिम दिवशी पक्षातील ज्येष्ठ नेत्यांच्या मध्यस्थीनंतर दिनेश ढोले यांनी आपला उमेदवारी अर्ज मागे घेतला. ढोले यांच्या माघारीमुळे अतुल लोंढे हेच आता काँग्रेसचे अधिकृत उमेदवार म्हणून रिंगणात असून पक्षांतर्गत वादावर तूर्तास पडदा पडला आहे.

८३६ मतदारांवर विजयाची मदार

या मतदारसंघात नागपूर महानगरपालिका, जिल्ह्यातील नगरपालिका आणि नगरपंचायतींमधील सुमारे ८३६ लोकप्रतिनिधी (नगरसेवक) मतदानाचा हक्क बजावणार आहेत. कागदावर संख्याबळाचे गणित भाजपच्या बाजूने झुकलेले असले, तरी काँग्रेसने ही लढत केवळ औपचारिक न ठेवता भाजपला थेट आव्हान देण्याचा निर्णय घेतला आहे. नागपूर हा भाजपचा बालेकिल्ला असला तरी सुनील केदार आणि काँग्रेस पक्षाने घेतलेल्या या आक्रमक भूमिकेमुळे आता भाजप विरुद्ध काँग्रेस असा थेट सामना रंगणार आहे.