पाण्याच्या बाटलीवरून वाद… नागपुरात तिघांनी सिमेंटच्या दगडाने एकाला ठेचले…

नागपुरातील मध्य भागी असलेल्या रामझुल्यावरून खाली उतरणाऱ्या शिडीखाली, स्टार गॅरेजजवळ एक अनोखकी व्यक्ती रक्ताच्या थारोळ्यात बेशुद्ध अवस्थेत पडला असल्याचे २१ जानेवारीला सकाळी ११ वाजताच्या सुमारास निदर्शनास आले. या व्यक्तीच्या चेहरा, डोके आणि तोंडावर गंभीर जखमा होत्या.

पोलिसांनी तातडीने त्याला मेयो रुग्णालयात दाखल केले. मात्र डॉक्टरांनी तपासणीअंती त्याला मृत घोषित केले. मृत व्यक्तीचे वय अंदाजे तीस ते पस्तीस वर्षे होते. दगावलेल्या व्यक्तीचा सावळा वर्ण, लांब चेहरा, मध्यम बांधा, लाल रंगाचा टी-शर्ट, हिरव्या रंगाचे जॅकेट, निळी जिन्स व काळे बूट असा त्याचा पेहराव होता. त्याच्या उजव्या हातावर ‘आर एस’ व मानेजवळ ‘रमेश’ असे गोंदलेले होते.

सदर घटनेबाबत उमर खान मुबारक अली खान यांनी दिलेल्या तक्रारीवरून तहसील पोलीस ठाण्यात जिवे ठार मारण्याचा गुन्हा दाखल करण्यात आला. मृतकाची ओळख पटली नसल्याने तसेच गुन्हा गंभीर स्वरूपाचा असल्याने तहसिल पोलिसांनी चार स्वतंत्र पथके तयार करून तपासाला वेग दिला. तांत्रिक तपास आणि खात्रीशीर माहितीनुसार पोलिसांनी संतराम सहेदलाल यादव याला इतवारी रेल्वे स्थानकावरून, तर रघुनाथ उर्फ राजा शुध्दोधन सोनवाने याला भिलगाव परिसरातून ताब्यात घेतले.

पोलिसी चौकशीत आरोपींनी या कृत्याबाबत कबुली दिली. या प्रकरणात न्यायालयाकडून आरोपींची पोलीस कोठडी मिळविण्यात आली असून, फरार आरोपी अनिल वाघाटे उर्फ तोतला याचा शोध सुरू आहे. ही संपूर्ण कारवाई अपर पोलीस आयुक्त राजेंद्र दाभाडे, उप पोलीस आयुक्त राहुल मदने, सहाय्यक पोलीस आयुक्त अनिता मोरे व वरिष्ठ पोलीस निरीक्षक संजय मेंढे यांच्या नेतृत्वाखाली पार पडली.

घटनेच्या दिवशी मद्य प्राशन केल्यावर…

दगावलेल्या व्यक्तीसह इतर तिघे आरोपी असे एकूण चार जण घटनेच्या दिवशी मद्य पिऊन घटनास्थळी आले होते. यावेळी मृतकाने पाण्याची बाटली देण्यास नकार दिल्याने वाद झाला. हा वाद क्षणात विकोपाला गेला. दारूच्या नशेत तिघांनी मृतकावर सिमेंटचे दगड उचलून डोके व तोंडावर वार केले. गंभीर जखमांमुळे मृतकाचा जागीच मृत्यू झाला. त्यानंतर तिघे आरोपी तेथून पसार झाले.