नागपुरात नवोदित महिला क्रिकेटपटूची आत्महत्या, विदर्भ क्रिकेट असोसिएशनने संघात न घेतल्यामुळे उचललं टोकाचं पाऊल

मूळची अकोला शहरातील असलेली आदिती ही अंडर-१५ क्रिकेट स्पर्धेसाठी विदर्भ संघाकडून खेळली होती. अकोल्यात क्रिकेटचे प्रशिक्षण घेतल्यानंतर ती नागपुरातील क्रिकेट अकादमीत प्रशिक्षणासाठी आली होती. तिचा भाऊ प्रज्वल हा सुद्धा क्रिकेटपटू असून तो वडिलांसह अकोला येथे राहतो. आदिती ही आईसह लक्ष्मीनगर चौकात उमालक्ष्मी अपार्टमेंटमध्ये दुसऱ्या माळ्यावर राहत होती. आदितीला आपणही क्रिकेटपटू व्हावे, अशी उच्छा होती. ती वेगवेगळ्या ठिकाणी सराव करायला जात होती.

प्राथमिक तपासात समोर आलेल्या माहितीनुसार शहरातील सुर्वे क्रिकेट अकादमीमध्ये ती प्रशिक्षण घेत होती. अलीकडेच झालेल्या व्हिसीएच्या निवड चाचण्यांमध्ये तिची निवड न झाल्यामुळे ती प्रचंड निराश आणि मानसिक तणावाखाली होती, घटनास्थळी मिळालेल्या हस्तलिखित चिठ्ठीत ‘माझी निवड झाली नाही’ असा उल्लेख असल्याचे तपासात समोर आले आहे. या प्रकरणी बजाजनगर पोलिसांनी आकस्मिक मृत्यूची नोंद केली असून, शक्य त्या सर्व बाजूंनी पोलीस तपास करत आहे.