शिक्षण विभागाचा प्रताप! शिक्षिकेला घराजवळील शाळा देण्यासाठी पुढील वर्षीची संचमान्यता गृहीत

शिक्षकांना अतिरिक्त ठरविताना संबंधित शैक्षणिक वर्षातील संचमान्यतेचा आधार घेतला जातो. त्यानुसार अतिरिक्त ठरणाऱ्या शिक्षकांचे अन्य शाळांमध्ये समायोजन केले जाते. मात्र, संबंधित शिक्षिकेच्या समायोजन आदेशात २०२६-२७ या पुढील शैक्षणिक वर्षाची संचमान्यता नमूद करण्यात आली आहे. त्यामुळे पुढील वर्षाची संचमान्यता गृहीत धरून शिक्षिकेला अतिरिक्त ठरविण्याचा निर्णय कोणत्या निकषांवर घेण्यात आला, असा प्रश्न उपस्थित झाला आहे.

दरम्यान, संबंधित शिक्षिकेला वर्धमाननगर परिसरातील घराजवळील शाळेतच समायोजन मिळाल्याने या प्रकरणाची चर्चा शिक्षण विभागात सुरू झाली आहे. घराजवळील शाळेत समायोजन मिळावे यासाठीच तिला अतिरिक्त ठरविण्यात आले का, अशी शंका व्यक्त केली जात आहे. तसेच, इतर शिक्षकांच्या समायोजनाच्या वेळीही पुढील वर्षाची संचमान्यता गृहीत धरण्यात आली आहे का, याची तपासणी करण्याची मागणी होत आहे.

जिल्हा परिषदेच्या प्राथमिक शिक्षण विभागातील शिक्षकांच्या नियुक्ती, मान्यता आणि समायोजन प्रक्रियेतील कथित अनियमिततेचे मुद्दे यापूर्वीही समोर आले आहेत. मान्यता नसतानाही शालार्थ आयडी तयार करून वेतन दिल्याच्या प्रकरणात गुन्हे दाखल झाले असून, अधिकारी, कर्मचारी, शिक्षक आणि संस्थाचालकांसह २० हून अधिक जणांना अटक झाल्याचे प्रकरण चर्चेत आहे. या पार्श्वभूमीवर समायोजनातील या प्रकाराचीही सखोल चौकशी करण्याची मागणी होत आहे.

आदेशात सुधारणा करण्याचे शिक्षणाधिकाऱ्यांच्या सूचना

आदेशात २०२६-२७ ची संचमान्यता नमूद झाली आहे. ती चुकीने झाली असून, आदेशात सुधारणा करण्याच्या सूचना देण्यात आल्या आहेत,” असे जिल्हा परिषदेचे प्राथमिक शिक्षणाधिकारी नीलेश गुंड यांनी सांगितले.