ईव्हीएम प्रकरणावरून नाना पटोलेंची भाजपवर टीका, पुरावे नष्ट करण्यासाठी मशिन्स जाळल्याचा आरोप

ईव्हीएम वादावरून भाजपवर गंभीर आरोप

काँग्रेसचे माजी प्रदेशाध्यक्ष नाना पटोले यांनी पुन्हा एकदा ईव्हीएमच्या मुद्द्यावरून भाजप आणि केंद्र सरकारवर टीका केली. ‘ना रहेगा बास, ना बजेगी बासुरी’ या म्हणीचा उल्लेख करत भाजप आणि पंतप्रधान नरेंद्र मोदी यांच्या नेतृत्वाखालील सरकार देशात कारभार करत असल्याचा आरोप त्यांनी केला. माध्यमांशी संवाद साधताना त्यांनी पश्चिम बंगालमधील निवडणूक प्रक्रियेबाबत गंभीर प्रश्न उपस्थित केले.

‘निवडणूक व्यवस्थापन आणि मॅच फिक्सिंगचा प्रयत्न’

पश्चिम बंगालमध्ये निवडणूक आयोगापासून ते संपूर्ण निवडणूक व्यवस्थापन यंत्रणा भाजपच्या बाजूने वळवण्याचा प्रयत्न झाला, असा दावा पटोले यांनी केला. निवडणूक प्रक्रियेत ‘मॅच फिक्सिंग’ झाल्याचा आरोप करत त्यांनी सांगितले की, हे चित्र संपूर्ण देशाने आणि पश्चिम बंगालच्या जनतेने उघड्या डोळ्यांनी पाहिले आहे. या संदर्भातील वाद आता सर्वोच्च न्यायालयात पोहोचला असून ईव्हीएम मशीनमध्ये मोठ्या प्रमाणावर फेरफार झाल्याच्या बाबी हळूहळू समोर येत असल्याचे त्यांनी म्हटले.

‘ईव्हीएम मशिन्स जाळून पुरावे नष्ट करण्याचा प्रयत्न’

ईव्हीएममधील कथित गडबडीबाबतचे आरोप लोकांसमोर येऊ लागल्यानंतर पश्चिम बंगालमध्ये ईव्हीएम मशिन्स जाळण्यात आल्याचा गंभीर आरोपही पटोले यांनी केला. या प्रकरणाची सखोल चौकशी होणे आवश्यक असल्याचे त्यांनी सांगितले. निवडणूक प्रक्रियेवरील जनतेचा विश्वास टिकवण्यासाठी सर्व संबंधित बाबी पारदर्शकपणे तपासल्या गेल्या पाहिजेत, अशी मागणीही त्यांनी केली.

रोहित पवारांच्या आंदोलनाला काँग्रेसचा पाठिंबा

दरम्यान, पंढरपूरमध्ये शेतकरी कर्जमाफीच्या मागणीसाठी राष्ट्रवादी काँग्रेस (शरद पवार गट)चे आमदार रोहित पवार यांनी सुरू केलेल्या आंदोलनाला काँग्रेसने पाठिंबा दर्शविला आहे. याबाबत बोलताना पटोले यांनी २०१६ मध्ये तत्कालीन फडणवीस सरकारने जाहीर केलेली कर्जमाफी ही फसवी ठरल्याचा आरोप केला. सरकार बदलले तरी अनेक शेतकऱ्यांची कर्जमाफी अद्याप पूर्ण झालेली नसल्याचे त्यांनी नमूद केले.

शेतकऱ्यांकडून आधी ठरावीक रक्कम भरण्याची अट घालूनच कर्जमाफीचा लाभ दिला जात असल्याचा आरोप करत पटोले म्हणाले की, त्यामुळे प्रत्यक्ष कर्जमाफी होण्याऐवजी शेतकऱ्यांच्या खिशातूनच पैसे काढून घेतले जात आहेत. बँकांची कर्जे प्रत्यक्षात माफ होताना दिसत नसल्याने शेतकऱ्यांमध्ये नाराजी वाढत असल्याचेही त्यांनी सांगितले. शेतकऱ्यांच्या विविध मागण्यांसाठी सुरू असलेल्या आंदोलनाला काँग्रेसचा पूर्ण पाठिंबा राहील, असे पटोले यांनी स्पष्ट केले.