नेपाळमध्ये महाप्रलय, साकोलीत काळजाचा ठोका चुकला; चिंतेत बुडालेल्या कुटुंबीयांना अखेर सुटकेचा नि:श्वास

साकोली येथील डॉ. रवींद्र झोडे यांचे सुपुत्र अतुल झोडे हे गिर्यारोहणाची आवड असलेले ट्रेकर असून, काही दिवसांपूर्वीच ते नेपाळला रवाना झाले होते. सुमारे ४ हजार १३० मीटर उंचीवरील अन्नपूर्णा बेस कॅम्प गाठण्याच्या मोहिमेवर असलेल्या अतुल यांच्याबाबत नेपाळमधील आपत्कालीन परिस्थितीच्या बातम्या समोर आल्यानंतर कुटुंबीयांची चिंता वाढली होती.

दरम्यान, कालपासून अतुल यांचा कुटुंबीयांशी संपर्क झाला. गुरुवारी सकाळीही त्यांच्याशी दूरध्वनीवरून संवाद झाला. अतुल यांनी आपण सुरक्षित असून प्रकृतीही ठीक असल्याचे सांगितले. हा एक फोन कुटुंबीयांसाठी केवळ संवाद नव्हता, तर संकटाच्या छायेत मिळालेला मोठा दिलासा होता.

‘अतुल सुखरूप आहे’ एवढ्या शब्दांनी चिंता झाली दूर

अतुल सुरक्षित असल्याचे स्पष्ट होताच त्यांच्या कुटुंबीयांसह मित्रपरिवाराने सुटकेचा नि:श्वास सोडला. नेपाळमधील परिस्थितीबाबत सोशल मीडियावर किंवा अन्य माध्यमांतून येणाऱ्या माहितीमुळे नागरिकांनी विनाकारण घाबरू नये, असे कुटुंबीयांनी सांगितले.

अन्नपूर्णाच्या उंच पर्वतरांगांमध्ये प्रतिकूल परिस्थितीतही अतुल सुरक्षित असल्याने आता त्यांच्या सुखरूप परतीची प्रतीक्षा साकोलीकरांना लागली आहे. संकटाच्या काळोखात आलेल्या एका फोनने झोडे कुटुंबाच्या चिंतेवर अखेर समाधानाची फुंकर घातली आहे.

गुरुवारी सकाळीही दूरध्वनीवरून त्यांच्याशी संवाद झाल्याचे डॉ. रवींद्र झोडे यांनी सांगितले. त्यामुळे चिंतेत असलेल्या कुटुंबीयांनी सुटकेचा नि:श्वास सोडला.

पर्वतांच्या कुशीत, मात्र सुरक्षित!..

अतुल ज्या भागात आहेत तो उंच पर्वतीय परिसर असल्याने तेथील परिस्थितीबाबत स्वाभाविकपणे चिंता निर्माण झाली होती. मात्र, त्यांची प्रकृती उत्तम असून कोणत्याही प्रकारचा धोका नसल्याचे कुटुंबीयांनी स्पष्ट केले आहे. अतुल यांच्या सुरक्षिततेची माहिती समोर आल्यानंतर साकोलीतील मित्रपरिवार आणि परिचितांमध्येही समाधानाचे वातावरण आहे. नेपाळमधील परिस्थितीमुळे चिंता करणाऱ्यांनी अफवांवर विश्वास न ठेवता अतुल सुरक्षित असल्याची माहिती लक्षात घ्यावी, असे आवाहन कुटुंबीयांनी केले आहे.

आता अन्नपूर्णाच्या उंच शिखरांच्या साक्षीने सुरू असलेली अतुल यांची ट्रेकिंग मोहीम सुखरूप पूर्ण होऊन ते साकोलीत परतण्याची प्रतीक्षा कुटुंबीय आणि मित्रपरिवाराला आहे. दरम्यान, नेपाळमध्ये अडकलेल्या भंडारा जिल्ह्यातील पर्यटकांनी जिल्हा प्रशासनाशी संपर्क साधावा असे आवाहन जिल्हा प्रशासनामार्फत करण्यात आले आहे.