ड्रायव्हिंग प्रशिक्षण संस्थांमुळे लाखो तरुणांना रोजगार; नितीन गडकरींचा मोठा दावा, म्हणाले…

ड्रायव्हिंग प्रशिक्षण संस्थांमुळे रोजगार कसा वाढणार?

नागपुरात ऑल इंडिया फेडरेशन ऑफ ड्रायव्हिंग स्कूल असोसिएशनशी संलग्न महाराष्ट्र राज्य मोटर ड्रायव्हिंग स्कूल मालक संघटनेतर्फे आयोजित ‘शून्य अपघात… माझी जबाबदारी’ या राष्ट्रीय अधिवेशनात गडकरी बोलत होते. यावेळी त्यांनी प्रशिक्षित आणि कुशल वाहनचालकांची देशात मोठी गरज असल्याचे सांगितले. दर्जेदार ड्रायव्हिंग प्रशिक्षण संस्थांच्या माध्यमातून लाखो तरुणांना रोजगाराच्या संधी निर्माण होऊ शकतात, असे त्यांनी नमूद केले.

रस्ता अपघातांची स्थिती किती गंभीर आहे?

देशात दरवर्षी सुमारे पाच लाख नागरिक रस्ता अपघातांत जखमी होतात, तर जवळपास दीड लाख जणांचा मृत्यू होतो. यामध्ये १८ ते ३५ वर्षे वयोगटातील नागरिकांचे प्रमाण तब्बल ६६ टक्के असल्याची माहिती गडकरी यांनी दिली.

अपघातांची प्रमुख कारणे कोणती?

रस्ता अभियांत्रिकीतील त्रुटी, वाहनांच्या रचनेतील दोष आणि मानवी चुका ही अपघातांची प्रमुख कारणे असल्याचे त्यांनी सांगितले. कायद्यांची अंमलबजावणी होत असली, तरी अनेकांकडून वाहतूक नियमांचे पालन केले जात नाही. त्यामुळे अपघात रोखण्यासाठी प्रशासनाबरोबरच नागरिकांचीही जबाबदारी तितकीच महत्त्वाची असल्याचे त्यांनी स्पष्ट केले.

अपघातग्रस्तांसाठी सरकारने कोणत्या योजना सुरू केल्या?

अपघातग्रस्ताला तातडीने रुग्णालयात दाखल करून उपचार मिळवून देणाऱ्या ‘राहगीर’ला केंद्र सरकारतर्फे २५ हजार रुपयांचे बक्षीस देण्याची योजना सुरू करण्यात आली आहे. तसेच अपघातातील जखमी व्यक्तीच्या उपचारासाठी दीड लाख रुपयांपर्यंत आर्थिक मदतीचीही तरतूद करण्यात आली आहे.

या योजनांचा उद्देश काय?

अपघातानंतर जखमी व्यक्तीला शक्य तितक्या लवकर उपचार मिळावेत, हा या योजनांचा मुख्य उद्देश असल्याचे गडकरी यांनी सांगितले. वेळेत उपचार मिळाल्यास सुमारे ५० टक्के जखमींचे प्राण वाचू शकतात, असा विश्वासही त्यांनी व्यक्त केला.

अधिवेशन कुठे झाले?

ऑल इंडिया फेडरेशन ऑफ ड्रायव्हिंग स्कूल असोसिएशनशी संलग्न महाराष्ट्र राज्य मोटर ड्रायव्हिंग स्कूल मालक संघटनेतर्फे नागपुरातील कविवर्य सुरेश भट सभागृहात ‘शून्य अपघात… माझी जबाबदारी’ या विषयावरील राष्ट्रीय अधिवेशनाचे आयोजन करण्यात आले होते. या अधिवेशनाचे उद्घाटन केंद्रीय मंत्री नितीन गडकरी यांच्या हस्ते झाले.