गडचिरोली : “मोठी स्वप्ने पाहा आणि ती पूर्ण करण्यासाठी शिक्षणाच्या बळावर सातत्याने प्रयत्न करा,” असा प्रेरणादायी संदेश देत भारताच्या राष्ट्रपती द्रौपदी मुर्मू यांनी गडचिरोली जिल्ह्यातील शासकीय आश्रमशाळांमधील ९६ आदिवासी विद्यार्थ्यांशी राष्ट्रपती भवनात अत्यंत आत्मीयतेने संवाद साधला. विद्यार्थ्यांचे हसतमुखाने स्वागत करत त्यांनी प्रत्येकाशी नाव, गाव, शिक्षण आणि भविष्यातील ध्येयाविषयी विचारपूस केली. देशाच्या प्रथम नागरिकांशी झालेला हा अविस्मरणीय संवाद विद्यार्थ्यांसाठी प्रेरणा आणि आत्मविश्वासाचा नवा स्रोत ठरला.
राष्ट्रपती भवनात विद्यार्थ्यांचे आत्मीय स्वागत
जिल्हा वार्षिक आदिवासी उपयोजनेअंतर्गत आयोजित करण्यात आलेल्या दिल्ली शैक्षणिक सहलीत गडचिरोली, अहेरी आणि भामरागड येथील शासकीय आश्रमशाळांतील ९६ विद्यार्थी सहभागी झाले आहेत. राष्ट्रपती भवनात पोहोचताच विद्यार्थ्यांचे उबदार स्वागत करण्यात आले. राष्ट्रपती मुर्मू यांनी विद्यार्थ्यांना चॉकलेट देत त्यांच्याशी अगदी आपुलकीने संवाद साधला. प्रत्येक विद्यार्थ्याचे नाव, तो कोणत्या गावातून आला आहे, कोणत्या वर्गात शिक्षण घेत आहे आणि भविष्यात कोणते क्षेत्र निवडण्याची इच्छा आहे, याची त्यांनी उत्सुकतेने माहिती घेतली.
‘मेहनत आणि शिक्षणाने कोणतेही स्वप्न साकार’
संवादादरम्यान गडचिरोली जिल्ह्यातील पोटेगाव येथील एका विद्यार्थ्याने भविष्यात शिक्षक होण्याची इच्छा व्यक्त केली. त्याचे ध्येय ऐकून राष्ट्रपतींनी त्याचे विशेष कौतुक केले. “मेहनत, चिकाटी आणि शिक्षणाच्या जोरावर कोणतेही स्वप्न साकार होऊ शकते,” असा मोलाचा सल्ला त्यांनी विद्यार्थ्यांना दिला. राष्ट्रपतींच्या या प्रेरणादायी शब्दांमुळे विद्यार्थ्यांमध्ये नवचैतन्य संचारले असून उच्च शिक्षण आणि मोठी उद्दिष्टे गाठण्याची उमेद अधिक दृढ झाली.
इतिहास, स्थापत्य आणि लोकशाहीचा प्रत्यक्ष अनुभव
भेटीनंतर विद्यार्थ्यांना राष्ट्रपती भवनातील विविध ऐतिहासिक दालने, भव्य वास्तू आणि परिसराची विशेष सफर घडविण्यात आली. या माध्यमातून राष्ट्रपती भवनाचा इतिहास, स्थापत्यवैभव आणि देशाच्या सर्वोच्च घटनात्मक संस्थेच्या कार्यपद्धतीची माहिती विद्यार्थ्यांना प्रत्यक्ष अनुभवातून मिळाली. राष्ट्रपती भवन प्रशासनातर्फे विद्यार्थ्यांसाठी अल्पोपहाराचीही विशेष व्यवस्था करण्यात आली होती.
दिल्ली शैक्षणिक सहलीतून ज्ञानाचा व्यापक प्रवास
दिल्ली शैक्षणिक सहलीदरम्यान विद्यार्थी संसद भवन, पंतप्रधान संग्रहालय, राष्ट्रीय विज्ञान केंद्र, आयआयटी दिल्ली, जंतरमंतर, राजघाट, लाल किल्ला, कुतुबमिनार तसेच राष्ट्रीय प्राणीसंग्रहालयाला भेट देत आहेत. या सहलीमुळे विद्यार्थ्यांना देशाची लोकशाही व्यवस्था, विज्ञान-तंत्रज्ञानातील प्रगती, सांस्कृतिक वारसा आणि उच्च शिक्षणाच्या संधींची व्यापक ओळख होत असून, त्यांच्या उज्ज्वल भविष्यासाठी ही सहल प्रेरणादायी ठरत आहे.
