दहावी, बारावीच्या परीक्षेची जबाबदारी प्राथमिक शिक्षकांना सोपवू नका, शिक्षण संघटनेने का केली मागणी?

शिक्षकांची जबाबदारी काय?

इयत्ता १० वी व १२ वीची परीक्षा माध्यमिक व उच्च माध्यमिक शिक्षण मंडळामार्फत घेण्यात येते. परीक्षा केंद्रावर प्रश्नपत्रिका, उत्तरपत्रिका पुरविण्यासाठी एका ठिकाणी सुरक्षित कस्टडी तयार करण्यात येते. येथे शिक्षण विभागातील अधिकारी व सहाय्यक यांची नेमणूक असते. नियमानुसार या कस्टडीत सहाय्यक म्हणून एका लिपिकाची व शिपाई यांची नेमणूक करावी लागते. पण शिक्षण विभागातील अधिकारी या कस्टडीत प्राथमिक शिक्षकांची नेमणूक करतात. परीक्षेदरम्यान इतरांकडून गैरप्रकार घडले, तरी शिक्षक मात्र हकनाक भरडले जातात. असे प्रकार घडू नये आणि प्राथमिक शिक्षकांचे नुकसान होऊ नये, म्हणून शिक्षण मंडळाने अशा कस्टडीत प्राथमिक शिक्षकांना नेमणूका देऊ नये आणि अशा नेमणुका शिक्षकांनी नाकाराव्यात, असे आवाहन प्राथमिक शिक्षक समितीने केले आहे.

अमरावतीत कोणता प्रकार घडला?

नुकताच अमरावती जिल्ह्यातील अंजनगाव सुर्जी येथील सीताबाई संगई विद्यालयातील परीक्षा केंद्रावर दोन उत्तरपत्रिका बाहेरून सोडवून आणण्याचा प्रकार उघडकीस आला. उपशिक्षणाधिकाऱ्यांच्या नेतृत्वातील भरारी पथकाने अचानक तपासणी केली, तेव्हा परीक्षार्थ्यांच्या संख्येच्या तुलनेत दोन उत्तरपत्रिका कमी असल्याचे आढळून आले. या उत्तरपत्रिका एका खासगी इसमाजवळ मिळून आल्या. या उत्तरपत्रिका सोडवण्यासाठी बाहेर नेण्यात आल्या होत्या, असे तपासणीदरम्यान निदर्शनास आले होते.

या प्रकरणात प्राथमिक शिक्षकांना दोषी ठरवणे चुकीचे आहे. प्रभारी गटशिक्षणाधिकारी, प्रभारी प्राथमिक शिक्षक, शिक्षण विस्तार अधिकारी यांच्यावर कायदेशीर कारवाई करण्यापूर्वी घटनेची सत्यता पडताळणे आवश्यक आहे. प्राथमिक विभागाचे कार्य सोडून माध्यमिक विभागाची कामे प्राथमिक शिक्षकांना का दिली जातात, या बाबत चौकशी व्हावी अशी मागणी प्राथमिक शिक्षक समितीने केली आहे.