नागपुरातील आदिवासी विद्यार्थ्यांनी राहुल गांधींशी संवाद साधला

प्रलंबित प्रश्नांकडे लक्ष वेधले

काँग्रेसच्या ‘संघटन सृजन अभियानां’तर्गत जिल्हा काँग्रेस कमिटीच्या अध्यक्षांची निवड व नियुक्ती प्रक्रियेचा भाग म्हणून नाशिक येथे दहा दिवसीय निवासी प्रशिक्षण शिबिराचे आयोजन करण्यात आले होते. २४ ऑगस्टपासून सुरू असलेल्या या शिबिराचा बुधवारी राहुल गांधी यांच्या प्रमुख उपस्थितीत समारोप झाला. समारोपाच्या कार्यक्रमानंतर गांधी यांनी नाशिक, पुणे, छत्रपती संभाजीनगर आणि नागपूर येथील आदिवासी विद्यार्थ्यांशी संवाद साधला. या वेळी विद्यार्थ्यांनी आदिवासी विद्यार्थ्यांच्या शिक्षणासह विविध प्रलंबित प्रश्नांची माहिती गांधी यांना दिली. राज्यातील आदिवासी विद्यार्थ्यांच्या मागण्यांकडे शासनाचे लक्ष वेधण्याची विनंतीही करण्यात आली.

विविध शहरांत आंदोलन

आदिवासी विद्यार्थी गेल्या काही दिवसांपासून आपल्या विविध मागण्यांसाठी राज्यातील विविध शहरांमध्ये आंदोलन करीत आहेत. नाशिक येथे मंगळवारी विद्यार्थ्यांच्या वतीने मोठा मोर्चा काढण्यात आला होता. या आंदोलनाच्या पार्श्वभूमीवर विद्यार्थ्यांनी राहुल गांधी यांची भेट घेऊन आंदोलनाची भूमिका आणि प्रलंबित मागण्यांची माहिती दिली. आदिवासी विकास विभागाशी संबंधित विविध प्रश्नांवर विद्यार्थ्यांमध्ये नाराजी आहे. आदिवासी विकास मंत्री अशोक उईके यांच्या राजीनाम्याची मागणीही आंदोलनकर्त्या विद्यार्थ्यांकडून करण्यात येत आहे. त्यामुळे विद्यार्थ्यांच्या आंदोलनाला राजकीय पाठिंबा मिळण्याची शक्यता या भेटीमुळे व्यक्त केली जात आहे.

‘छात्र की गुंज’मध्येही संवाद

यापूर्वी पुणे येथे आयोजित करण्यात आलेल्या ‘छात्र की गुंज’ कार्यक्रमातही राहुल गांधी यांनी आदिवासी विद्यार्थ्यांशी संवाद साधला होता. या वेळी त्यांनी विद्यार्थ्यांच्या समस्या जाणून घेतल्या आणि त्यांच्या प्रश्नांवर चर्चा केली होती. विद्यार्थ्यांच्या आंदोलनाची माहिती घेतल्यानंतर त्यांच्या उपोषण आंदोलनाला भेट देण्याचे निमंत्रण देण्याची सूचनाही गांधी यांनी केली होती. त्यामुळे नाशिक येथील भेटीत विद्यार्थ्यांनी पुन्हा एकदा आपल्या मागण्यांचा मुद्दा त्यांच्या समोर मांडला.

विद्यार्थ्यांच्या लढ्यात साथ देण्याचे आश्वासन

नाशिक येथील संवादादरम्यान विद्यार्थ्यांनी आपल्या मागण्यांबाबत सविस्तर माहिती दिली. शिक्षण, आदिवासी विकास विभागाशी संबंधित प्रश्न आणि शासनाकडे प्रलंबित असलेल्या मागण्यांवर विद्यार्थ्यांनी गांधी यांचे लक्ष वेधले.
विद्यार्थ्यांच्या आंदोलनाची दखल घेत राहुल गांधी यांनी त्यांच्या लढ्यात काँग्रेस पक्ष त्यांच्या सोबत असल्याचे आश्वासन दिले. त्यामुळे राज्यातील आदिवासी विद्यार्थ्यांच्या आंदोलनाला काँग्रेसचा पाठिंबा मिळाल्याचे स्पष्ट झाले आहे