‘आरएसएस’च्या भैय्याजी जोशींचे पुन्हा वादग्रस्त विधान म्हणाले, मोदी सरकारच्या काळात पद्मश्री पुरस्काराचा सन्मान वाढला

राष्ट्रीय स्वयंसेवक संघाचे भैय्याजी जोशी यांच्या मुंबईतील मराठी भाषेबाबतच्या वक्तव्यामुळे राज्यात वाद निर्माण झाला होता.

Written by लोकसत्ता टीम

नागपूर

Updated: February 25, 2026 17:22 IST

नागपुरात आयोजित एका कार्यक्रमात पद्मश्री सत्यनारायण नुवाल यांचा सत्कार करताना राष्ट्रीय स्वयंसेवक संघाचे ज्येष्ठ नेते भैय्याजी जोशी.(छायाचित्र - लोकसत्ता टीम)

नागपूर: राष्ट्रीय स्वयंसेवक संघाचे भैय्याजी जोशी यांच्या मुंबईतील मराठी भाषेबाबतच्या वक्तव्यामुळे राज्यात वाद निर्माण झाला होता. जोशी यांनी मुंबईची भाषा एकच नाही ,असे म्हटले होते. मनसेचे नेते राज ठाकरे आणि शिवसेना ठाकरे गटानेही यावरून सरकारला धारेवर धरले होते.

यानंतर भैय्याजी जोशी यांनी पुन्हा एकदा पद्मश्री पुरस्कारावरून वादग्रस्त विधान केले आहे. यामुळे पुन्हा एकदा नवीन वाद निर्माण होण्याची शक्यता आहे.माधव नेत्रालय, नेत्र संस्थान आणि अनुसंधान केंद्र चॅरिटेबल ट्रस्टचे अध्यक्ष आणि प्रसिद्ध उद्योगपती सत्यनारायण नुवाल यांना पद्मश्री पुरस्काराने सन्मानित करण्यात आले. त्यानिमित्ताने माधव नेत्रालयच्यावतीने नुवाल यांचा भैय्याजी जोशी यांच्या हस्ते सत्कार करण्यात आला. यावेळी ते म्हणाले, २०१४ च्या पूर्वी आम्हाला सत्यनारायण नुवाल यांच्यासारख्या व्यक्तींचा सन्मान करण्याची संधी मिळत नव्हती.

पुरस्कारानंतर वर्तमानपत्रात त्यांचे नाव वाचल्यावर ही व्यक्ती कोण आहे? असा प्रश्न पडत होता. मात्र मागील दहा वर्षात पद्मश्री पुरस्कार तळागळातील व्यक्तीचा शोध घेतो. त्यामुळे दहा वर्षात पद्मश्री पुरस्काराचा सन्मान वाढला. यावेळी मोतीलाल ओसवाल, गणपत कोठारी, निखिल मुंडले, अविनाशचंद्र अग्निहोत्री उपस्थित होते.

हेही वाचा

South East Central Railway: महाराष्ट्र-मध्य प्रदेशला जोडणाऱ्या रेल्वे मार्गाच्या दुहेरीकरणास मंजुरी; वन्यजीव पर्यटनाला चालना

भैय्याजी जोशी म्हणाले, देशात प्रतिभावान लोकांची कमतरता नाही. काम करणारे अनेक लोक रांगेत आहेत. मात्र, अशा लोकांना शोधून त्यांच्या सन्मान करणारी सरकारी यंत्रणा फार महत्त्वाची आहे. सरकार अशा लोकांना शोध घेते याचे कौतुक आहे. सत्यनारायण नुवाल यांचे संपूर्ण जीवन अभ्यास करण्यासारखे आहे. राजस्थान सारख्या राज्यातून येऊन एका छोट्या उपक्रमातून त्यांनी इतका मोठा उद्योग उभा केला. व्यवसाय करणे, पैसे कमावणे काही मोठी गोष्ट नाही. पण परिश्रमातून, सन्मार्गाने पैसे कमवून मोठे होणे महत्वाचे आहे. देशाला स्वातंत्र्य मिळाल्यानंतर देश स्वावलंबी करण्यासाठी प्रयत्न झाले, पण त्यात हवे तसे यश मिळाले नाही. मात्र आज देशाच्या संरक्षणासाठी आवश्यक असा व्यवसाय उभा करून देशाला स्वावलंबी बनवण्यात नुवाल यांचे मोठे योगदान आहे.

छोट्याशा यशाने लोकं अहंकारी होतात

आम्ही राजकारणाच्या जवळ आहोत असे लोकांना वाटते. त्यामुळे पुरस्कारासाठी काही जण भेटी घेतात. मात्र, नुवाल यांना पुरस्कार जाहीर झाल्यावरच त्यांना पुरस्कार जाहीर झाल्याचे कळले. आज खऱ्या अर्थाने पद्मश्री पुरस्काराचा सन्मान होतो आहे. लोक छोट्याशा यशाने अहंकारी होतात. पण अहंकार शून्य व्यक्ती म्हणजे नुवाल आहेत, असेही भैय्याजी जोशी म्हणाले. यावेळी मोतीलाल ओसवाल, गणपत कोठारी यांनीही नुवाल यांच्या कार्याचा गौरव केला.