रूपाली चाकणकर अजित पवारांच्या आठवणीने भावूक म्हणाल्या, दादांचे जाणे हे केवळ पक्षाचे नाही तर…

नागपूर येथे आयोजित विशेष बैठकीत बोलताना चाकणकर म्हणाल्या, “सुनेत्रावहिनींवर कोसळलेला दुःखाचा डोंगर आपण समजू शकतो. अशा वेळी संपूर्ण पक्ष त्यांच्या पाठीशी ठामपणे उभा आहे. मात्र आता थांबून चालणार नाही; दादांनी शिकवलेल्या शिस्तीत आणि तडफेने संघटनेचे काम तळागाळापर्यंत पोहोचवणे हीच खरी श्रद्धांजली ठरेल.” त्यांच्या या वक्तव्याने उपस्थित कार्यकर्ते भारावून गेले.

अजित पवार यांच्या निधनामुळे राज्याच्या राजकारणात निर्माण झालेली पोकळी कधीही भरून निघणार नाही, अशी भावना बैठकीत व्यक्त करण्यात आली. संघर्ष, संघटनशक्ती आणि जनसेवेची बांधिलकी हा दादांचा वारसा अधिक जोमाने पुढे नेण्याचा निर्धार पदाधिकाऱ्यांनी व्यक्त केला.

बैठकीचे प्रास्ताविक आणि संचालन शहर कार्याध्यक्ष श्रीकांत शिवणकर यांनी केले. आपण सर्वांनी एकत्रितपणे काम करत पक्ष अधिक बळकट करणे आवश्यक आहे. नेतृत्वावर विश्वास ठेवून संघटन वाढवणे ही काळाची गरज आहे, असे ते म्हणाले.

या बैठकीस ग्रामीण जिल्हाध्यक्ष राजाभाऊ टाकसळे, शहर महिला अध्यक्षा सुनीता येरणे, ग्रामीण महिला अध्यक्षा करिष्मा चुटे, नरेश अरसडे, तानाजी वनवे, नूतन रेवतकर, रूपाली पिचकाटे आदींसह नागपूर जिल्ह्यातील प्रमुख पदाधिकारी उपस्थित होते. बैठकीत आगामी काळात अधिक सक्रियतेने संघटनात्मक काम करण्याचा निर्धार व्यक्त करण्यात आला.