जनसंवाद कार्यक्रमात संभाजी राजेंची गर्जना नागपूर : चर्चेत वेळ घालवू नका, आरक्षणावर तातडीने तोडगा काढा, अन्यथा रस्त्यावर उतरू, असा इशारा राज्यसभा सदस्य व मराठा समाजाचे नेते छत्रपती संभाजी राजे यांनी सरकारला दिला. शिवाजी पुतळा चौकात झालेल्या जनसंवाद कार्यक्रमात ते बोलत होते. यावेळी नागपूरचे मुधोजी राजे भोसले, राजे संग्रामसिंह भोसले, दीपक जाधव, छोटू पवार, प्रशांत भोसले आदी सकल मराठा समाजाचे इतर नेते उपस्थित होते. मराठा शिपाई म्हणून वाडय़ातून बाहेर पडलो ते केवळ समाजासाठी. सरकारने आमची बाजू समजून आरक्षणाच्या मुद्यावर तोडगा काढला पाहिजे. सरकरने वेळकाढू धोरण सोडावे व तोडगा काढावा, केवळ चर्चा करून मराठा समाजाचे प्रश्न सुटणार नाही तर सरकारला निश्चित धोरण ठरवावे लागेल. मराठा समाजाच्या आरक्षणासाठी आजी-माजी मुख्यमंत्र्यांनी एकत्र यावे, अशीही मागणी संभाजी राजे यांनी केली. राज्य विधिमंडळाचे पावसाळी अधिवेशन सुरू आहे. या अधिवेशनात मराठा समाजाच्या मागण्यांवर किमान दोन तास चर्चा करावी. जर मागण्या पूर्ण झाल्या नाही तर स्थगित केलेले मूक आंदोलन पुन्हा सुरू करण्यात येईल, असा इशाराही छत्रपती संभाजी राजे यांनी दिला. मुधोजी राजे भोसले व संग्रामसिंह भोसले यांचीही यावेळी भाषणे झाली. शिवाजी पुतळा चौकात जनसंवाद कार्यक्रमात बोलताना खासदार संभाजीराजे.