Maharashtra Weather Alert : कोकण ते विदर्भ तापमानात वाढ; दुपारी कडक उन्हाचा चटका

राज्यातील हवामानात सध्या लक्षणीय चढउतार सुरू आहेत. सकाळी हलकी थंडी आणि दुपारी कडक ऊन, अशी द्विधा स्थिती अनेक शहरांत अनुभवास येत आहे. याच पार्श्वभूमीवर भारतीय हवामान विभाग खात्याने पुढील २४ तासांत कमाल तापमानात वाढ होण्याचा इशारा दिला आहे. त्यामुळे राज्यातील काही भागांत उष्णतेच्या झळा अधिक तीव्र होण्याची शक्यता व्यक्त करण्यात आली आहे.

मुंबई, ठाणे, नवी मुंबईसह संपूर्ण कोकण किनारपट्टी भागात आज उष्ण आणि दमट वातावरण राहील. मुंबई परिसरात कमाल तापमान ३५ ते ३६ अंश सेल्सिअस दरम्यान राहण्याची शक्यता आहे, तर किमान तापमान २३ ते २४ अंशांच्या आसपास नोंदवले जाईल. आर्द्रतेचे प्रमाण जास्त असल्याने दुपारच्या वेळी उकाडा अधिक तीव्र जाणवेल. रायगड आणि सिंधुदुर्ग जिल्ह्यांतही उष्णतेची हीच स्थिती कायम राहणार आहे.

पश्चिम महाराष्ट्रात सकाळच्या वेळी किंचित गारवा जाणवेल. किमान तापमान १८ ते २० अंशांच्या दरम्यान राहील; मात्र दुपारनंतर कमाल तापमान ३६ ते ३७ अंशांपर्यंत पोहोचेल. दिवसभर ऊन चटके देणारे राहील आणि संध्याकाळनंतर तापमानात थोडीशी घट झाली, तरी उकाड्याचा प्रभाव कायम राहील.

मराठवाडा आणि विदर्भात कोरडे व उष्ण हवामान कायम राहणार आहे. मराठवाड्यात कमाल तापमान ३७ ते ३८ अंशांपर्यंत वाढण्याचा अंदाज आहे, तर किमान तापमान १७ ते १९ अंशांच्या आसपास राहील. विदर्भात उष्णतेची तीव्रता अधिक जाणवेल आणि काही भागांत कमाल तापमान ३८ ते ३९ अंशांपर्यंत नोंदवले जाईल. दुपारच्या वेळी कडक ऊन आणि उष्ण वाऱ्यांमुळे त्रास वाढू शकतो.

एकंदरीत १७ फेब्रुवारी रोजी राज्यातील बहुतांश भागांत कमाल तापमानात सुमारे एक अंशाची वाढ होईल, तर किमान तापमानात विशेष बदल होणार नाही. आकाश मुख्यतः स्वच्छ राहील आणि पावसाचा कोणताही इशारा नसल्याचे हवामान विभागाने स्पष्ट केले आहे. पावसाचा धोका टळला असला, तरी वाढत्या उष्णतेपासून सावध राहण्याची गरज आहे. फेब्रुवारी महिन्यात तापमानात सातत्याने चढउतार राहतील, असा अंदाज यापूर्वीच हवामान विभागाने वर्तवला होता. त्यानुसार सकाळी गारवा आणि दुपारी उन्हाचा चटका अधिक तीव्र होण्याची शक्यता आहे. पुढील काही दिवस कमाल तापमानात आणखी वाढ होऊ शकते.