सर्वोच्च नक्षल नेता देवजीबद्दल गूढ कायम; कुटुंबियांना पोलीसांवर संशय

बुधवारी आंध्रप्रदेशात झालेल्या चकमकीत सात नक्षलवादी ठार झाले होते. यात देवजीचा समावेश असल्याची अफवा पसरली होती. मात्र, आंध्र प्रदेश गुप्तचर विभागाचे अतिरिक्त पोलीस महासंचालक महेश कुमार लड्डा यांनी चकमकीत मारल्या गेलेल्या नक्षलवाद्यांमध्ये देवजींचा समावेश नसल्याचे स्पष्ट केले होते. पोलीसांनी देवजी तेलंगणा किंवा छत्तीसगडमध्ये असावा, अशी शंका व्यक्त केली आहे. मंगळवारच्या चकमकीतून जवळपास १५ नक्षलवादी पळून जाण्यात यशस्वी झाले होते. त्यामुळे देवजी देखील पळून गेलेल्या या गटात असण्याची शक्यता पोलीसाकडून वर्तवण्यात येत आहे.

दुसरीकडे देवजीचे कुटुंबीय पोलिसांच्या म्हणण्यावर विश्वास ठेवण्यास तयार नाहीत. मंगळवारी देवजीच्या सुरक्षा पथकातील नऊ सदस्यांना आंध्र प्रदेश पोलीसांनी ताब्यात घेतले होते. त्यामुळे देवजी देखील पोलिसांच्या ताब्यात आहे. अशी शंका कुटुंबियांनी व्यक्त केली आहे. जर पोलिसांनी देवजीला अटक केली असेल, तर तातडीने न्यायालयात हजर करावे, अशी मागणी देवजीचा भाऊ थिप्पीरी गंगाधर यांनी त्यांच्या मूळ गावी, कोरुतला येथे माध्यमांशी बोलताना केली आहे. त्यामुळे देवजी कुठे आहे, याबद्दल गूढ अधिक वाढले आहे.

हिडमाचा मृत्यू चकमकीतच

कुख्यात नक्षल कमांडर हिडमा आत्मसमर्पण करण्याच्या तयारीत होता. मात्र, त्याला पकडून ठार करण्यात आल्याचा आरोप करण्यात येत आहे. या आरोपांचे पोलीस अधिकार्‍यांनी खंडन केले आहे. हिडमाने आत्मसमर्पण करण्याची इच्छा व्यक्त केली होती, अशा प्रकाराचे कुठलेही पत्र प्रशासनाकडे नसल्याचेही त्यांनी स्पष्ट केले. दरम्यान, गुरुवारी हिडमा आणि त्याच्या पत्नीवर पूर्वती या मूळ गावी अंत्यसंस्कार करण्यात आले. यावेळी कुटुंबिय व गावकरी उपस्थित होते.