लोकसत्ता टीम अकोला: ‘क्राईम शो’ पाहून मनावर परिणाम झालेल्या लहान बहिणीने किरकोळ वादातून मोठ्या बहिणीवर चाकूने सपासप वार करून यमसदनी धाडल्याची धक्कादायक घटना अकोला जिल्ह्यातील खडका गावात घडली. या प्रकरणी बोरगाव मंजू पोलिसांनी आरोपी लहान बहिणीला अटक केली आहे. जिल्ह्यातील बोरगाव मंजू पाेलीस ठाण्यांतर्गत येणाऱ्या खडका गावात विठ्ठल वसतकार हे कुटुंबीय पत्नी, दोन मुली व एक मुलासह राहत होते. मोठी मुलगी रेश्माचा (२४) विवाह झाला होता. लहान मुलगी रविना (२१) ही घरीच राहत होती. रविनाला टीव्हीवर ‘क्राइम शो’ पाहण्याची आवड होती. रक्तरंजित हत्या, प्राणघातक हल्ले पाहून रविनाच्या मनावर परिणाम झाला. तसेच ती मानसिक आजारी असल्याचेही बोलले जाते. हेही वाचा. यवतमाळ : बापरे! त्यांनी चोरल्या अकरा दुचाकी; तक्रार दाखल होताच पोलिसांनी आवळल्या मुसक्या गेल्या काही महिन्यांपासून रविना मानसिक तणावात होती. तिच्यावर मनोरुग्ण रुग्णालयात उपचार सुरू असल्याची देखील माहिती आहे. दरम्यान, गत आठवड्यात मोठी मुलगी रेश्मा माहेरी आली. दरम्यान, २९ मे रोजी उशिरा रात्री विठ्ठल वसतकार व त्यांची पत्नी घरात बसले होते. दोन्ही बहिणी खोलीमध्ये बोलत असतांना त्यांच्यात वाद झाला. हा वाद विकोपाला गेल्याने रागाच्या भरात लहान बहिण रविनाने धारदार चाकूने मोठी बहिण रेश्मावर सपासप वार केले. ती गतप्राण होत नाही, तोपर्यंत हल्ला करीत राहिली. हेही वाचा. शिवसेना ते काँग्रेस राजकीय प्रवासात धानोरकरांची लढाऊ वृत्ती कायम प्रचंड गोंधळ ऐकून आई-वडील खोलीत दाखल होताच त्यांना मोठी मुलगी रेश्मा ही रक्ताच्या थारोळ्यात पडलेली दिसली. हे पाहून आई-वडिलांना मोठा धक्का बसला. या घटनेची माहिती मिळताच बोरगाव मंजू पोलिसांनी घटनास्थळावर धाव घेतली. त्यांनी पंचनामा करून रेश्माचा मृतदेह उत्तरीय तपासणीसाठी सर्वोपचार रुग्णालयात पाठवला. पोलिसांनी आरोपी रविनाला अटक करून तिच्या विरूद्ध गुन्हा दाखल केला आहे.
