थुंकीतून काळा कोळसा, तर नाकातून काळा … प्रदूषित चंद्रपुरातील नागरिकांची आपबिती

चंद्रपूर देशात तिसऱ्या व चौथ्या क्रमांकाचे प्रदूषित शहर आहे. ३६५ दिवसांपैकी ३०० ते २७५  दिवस येथे प्रदूषण होते. यावर्षी पावसामुळे २०१ दिवस प्रदूषित होते. मात्र यापूर्वी सातत्याने ३०० दिवस प्रदूषित असायचे. या प्रदूषणामुळे लोकांना दमा, खोकला, त्वचा रोग, केस गळती, ऱ्हदयविकार तसेच इतरही आजार झालेले आहेत. मात्र आता तर त्यातून भयावह परिस्थिती दिसून येत आहे. तुकूम भागातील नागरिकांच्या थुंकीतून काळसा पडत असल्याचे एका नागरिकाने सांगितले आहे. तसेच आम्हाला दररोजच्या खाण्यापिण्यापेक्षा औषधांचा खर्च अधिक आहे.

कारण आम्हाला दमा, खोकला हा सातत्याने असतोच असेही सांगितले. एकाने तर नाकातून काळे पाणी पडते, सर्दी सातत्याने होते, केस गळती मोठ्या प्रमाणात असल्याची माहिती दिली. एका गृहिणीने प्रसूती झाल्यानंतर किमान पाच वर्ष मुलांची अतिशय काळजी घ्यावी लागते असे सांगितले. मुल पाच वर्षाची झाली तरी त्यांना खोकला, सर्दी हे आजार कायमच असतात असेही ते म्हणाले. सर्दी व खोकल्याचा त्रास तर प्रत्येक घरातील मुलांना असल्याची बाब महिलेने निदर्शनस आणून दिली. या भागातील काहींचे मुल पुणे, नागपूर येथे वास्तव्याला आहेत.

प्रदूषणाच्या त्रासामुळे मुलं चंद्रपूरला येत नाही असे एका महिलेने सांगितले. चंद्रपूरात जंगल व झाडे दिसत असली तरी झाडांची पाने हिरवीकंच दिवण्यापेक्षा काळी दिसतात. या झाडांवर कोळशाची प्रचंड धुळ साचलेली असते असे, त्यामुळे झाडाची पाने हिरवी कि काळी असा प्रश्न आहे असे अनेकांचे मत आहे. घराच्या स्लॅपवर धुळ, घरात कितीही साफसफाई केली तरी घरात धुळीचे साम्राज्य राहत असल्याची बाब एका गृहिणीने मांडली.

जेवायचे कमी आणि औषधांचा खर्च अधिक आहे, प्रत्येक महिन्याला पाच ते सहा हजार रूपये स्कीन स्पेशालिस्ट डॉक्टरांना द्यावे लागते, इतका खर्च परवडत नाही असे एका युवतीने सांगितले. घरातील भांडी, स्वयंपाकघरात सर्वत्र धुळ राहते. हवेचा दाब खाली असला की प्रदूषणामुळे माणसाला माणूस दिसत नाही इतके प्रदूषण या भागात असते असेही एकाने व्यक्त केले. दरम्यान बाहेरगावी वास्तव्याला असलेली मुल, मुली शहरात येण्यास टाळतात अशी माहिती एका व्यक्तीने दिली. एकूणच प्रदूषणामुळे लोकांना मोठा त्रास होत असून आयुष्यमान कमी झाले आहे असे मत पर्यावरण अभ्यासक सुरेश चोपणे यांनी व्यक्त केले आहे.