उमरेड-कऱ्हांडला अभयारण्यात रंगला “एफ-२” वाघिणीच्या मातृत्वाचा सोहळा

आता ‘एफ-२’ नावाची वाघीणसुद्धा तिच्या पाच बछड्यांसह पर्यटकांना आकर्षित करत आहे. उमरेड कऱ्हांडला अभयारण्यातील गोठणगाव गेट जवळ “एफ-२” नावाच्या या वाघिणीसह तिच्या पाच बछड्यांचे उमरेड कऱ्हांडला अभयारण्यात पर्यटकांना दर्शन होत असल्याने पर्यटक सुखावले आहेत. “एफ-२” वाघीण ही “फेअरी” वाघिणीची मुलगी आहे. “एन-४” आणि “पाटील” नावाच्या दोन वाघासोबत तिचा वावर होता.

उमरेड-कऱ्हांडला अभयारण्यात "एफ-२" वाघीण आणि तिच्या बछड्यांचा रंगलेला मातृत्वाचा सोहळा पर्यटकांना पाहायला मिळाला. अमरावती येथील अप्पर आयुक्त व वन्यजीवप्रेमी, वन्यजीव छायाचित्रकार गजेंद्र बावणे यांनी हा सोहोळा अचूक टिपला. pic.twitter.com/WrIpjlCJjJ

— LoksattaLive (@LoksattaLive) March 27, 2025

वाघीण आणि तिच्या बचड्यांना पाहण्यासाठी पर्यटकांमध्ये चुरस लागल्याने अक्षरशः त्या संपूर्ण कुटुंबाची वाट अडवण्याचा प्रकार दरम्यानच्या काळात झाला होता. ज्यामुळे पर्यटक मार्गदर्शक, वाहनचालकच नव्हे तर पर्यटकसुद्धा अडचणीत आले होते. वाहनचालक आणि पर्यटक मार्गदर्शक यांचे काही कालावधीसाठी निलंबन तर पर्यटकांना अभयारण्यात बंदी घालण्यात आली होती. त्यामुळे थोडीफार का होईना शिस्त लागली आहे. मात्र, वाघाच्या कुटुंब दर्शनासाठी अभयारण्य प्रशासनाच्या मर्जीतील रिसॉर्टचालकांकडून आगाऊ बुकिंग देखील करण्यात आले आहे. त्यामुळे सर्वसामान्य पर्यटकांना वाघाचे हे सहकुटुंब व्याघ्रदर्शन कठीण झाले आहे.