तुकाराम मुंढेंच्या आयुष्यावर पुस्तक, सगळा संघर्ष ‘तुकाराम’मधून जगासमोर येणार; कोणते खुलासे होणार?

‘तुकाराम’ हे पुस्तक नेमके कशामुळे चर्चेत आले आहे?

तुकाराम मुंढे हे महाराष्ट्रातील सर्वाधिक चर्चेत राहिलेल्या अधिकाऱ्यांपैकी एक मानले जातात. त्यांच्या प्रशासकीय कारकिर्दीत अनेक धाडसी निर्णय, वादग्रस्त घडामोडी आणि जनहिताच्या भूमिका पाहायला मिळाल्या. त्यामुळे तुकाराम मुंढे यांच्यावरील पुस्तक प्रकाशित होत असल्याने त्याची चर्चा सुरू झाली आहे. पुस्तकार मुंढे यांच्या बालपणापासून ते प्रशासकीय सेवेतल्या महत्त्वाच्या टप्प्यांपर्यंतचा प्रवास, संघर्ष, बदलींची मालिका, विविध पदांवरील अनुभव आणि जनतेशी जोडलेली त्यांची प्रतिमा यावर प्रकाश टाकला जाण्याची अपेक्षा आहे.

पुस्तकाचे प्रकाशन कधी आणि कुठे?

पुस्तकाचे प्रकाशन १७ जुलै रोजी पुण्यातील टिळक स्मारक मंदिर येथे आयोजित करण्यात आले आहे. प्रकाशन सोहळ्याबाबतची घोषणा झाली असली तरी प्रमुख पाहुणे किंवा प्रकाशन कोणाच्या हस्ते होणार याबाबतची माहिती अद्याप जाहीर करण्यात आलेली नाही.

पुस्तकाबाबत उत्सुकता का वाढली आहे?

तुकाराम मुंढे यांच्याबद्दल समाजात दोन टोकाच्या प्रतिक्रिया नेहमीच दिसून आल्या आहेत. एका बाजूला त्यांना प्रामाणिक, निर्भीड आणि जनतेसाठी लढणारा अधिकारी मानले जाते, तर दुसरीकडे त्यांच्या कार्यशैलीवर टीकाही होत आली आहे. त्यामुळे त्यांच्या आयुष्यावरील पुस्तकातून अनेक अनोळखी पैलू समोर येण्याची उत्सुकता आहे. सोशल मीडियावर पुस्तकाच्या घोषणेनंतर मोठ्या प्रमाणात प्रतिक्रिया उमटत आहेत. अनेक समर्थकांनी हे पुस्तक वाचण्याची उत्सुकता व्यक्त केली आहे. काहींनी याला ‘प्रशासनातील धाडसाचा इतिहास’ असे संबोधले असून अनेक जण पुस्तकात आतापर्यंत अज्ञात राहिलेल्या घटनांचा समावेश असेल, अशी अपेक्षा व्यक्त करत आहेत.

हे पुस्तक कोणासाठी महत्त्वाचे ठरू शकते?

स्पर्धा परीक्षा देणारे विद्यार्थी, प्रशासनात करिअर करू इच्छिणारे युवक, शासनव्यवस्थेतील कार्यपद्धती समजून घेऊ इच्छिणारे वाचक आणि तुकाराम मुंढे यांच्या कार्याचे अभ्यासक यांच्यासाठी हे पुस्तक विशेष महत्त्वाचे ठरू शकते. एका अधिकाऱ्याच्या संघर्षमय प्रवासातून नेतृत्व, निर्णयक्षमता आणि तत्त्वनिष्ठा यांचे अनेक पैलू समजून घेण्याची संधी यातून मिळू शकते. ‘तुकाराम’ हे पुस्तक न्यू ईरा पब्लिकेशनतर्फे प्रकाशित होत असून त्याचे लेखक शफी पठाण आहेत.