‘अधिवेशनात आमदार सावजी शोधतात, कुणी आजारी पडत नाही’; तुकाराम मुंढे यांना कुणी सुपारी दिली? समाजमाध्यमांवर संतप्त प्रतिक्रिया

समाजमाध्यमांवर नेमक्या कोणत्या प्रतिक्रिया उमटत आहेत?

मुंढे यांच्या वक्तव्यानंतर फेसबुक, व्हॉट्सॲप, इन्स्टाग्राम आणि एक्सवर संतप्त प्रतिक्रियांचा पूर आला आहे. अनेकांनी सावजी भोजनाचे फोटो, व्हिडिओ आणि स्वतःचे अनुभव शेअर करत विदर्भाच्या खाद्यसंस्कृतीच्या समर्थनार्थ भूमिका मांडली आहे.

कोणती पोस्ट सर्वाधिक चर्चेत आहे?

हलबा उद्योजक ग्रुपवर एक पोस्ट चर्चेत आहे. त्यात नागपूर अधिवेशनात आमदार व त्यांचे कार्यकर्ते सावजी भोजनालय शोधत असतात. कोणीही आजारी पडल्याचे ऐकिवात नाही. मुंढे साहेबांना कुणी सुपारी दिली वाटते. एकदा तरी सावजी खाऊन तर पाहा, अशा आशयाची पोस्ट मोठ्या प्रमाणावर शेअर होत आहे. या पोस्टवर शेकडो प्रतिक्रिया आणि समर्थनाच्या टिप्पण्याही दिसून येत आहेत.

आणखी काय प्रतिक्रिया व्यक्त होत आहेत?

सावजी आमचा अभिमान, विदर्भाची ओळख सावजी, सावजीवर टीका मान्य नाही, सावजी म्हणजे परंपरा अशा आशयाच्या पोस्ट मोठ्या प्रमाणावर व्हायरल होत आहेत. अनेकांनी #सावजी, #Savji यांसारखे हॅशटॅग वापरत सावजी भोजनाचे फोटो आणि व्हिडिओही शेअर केले आहेत.

नागपूर अधिवेशनाचा संदर्भ का दिला जात आहे?

प्रतिक्रिया देणाऱ्यांचे म्हणणे आहे की, राज्य विधिमंडळाचे हिवाळी अधिवेशन नागपुरात होत असताना राज्यभरातून येणारे मंत्री, आमदार आणि त्यांचे कार्यकर्ते सावजी भोजनालयांमध्ये आवर्जून भोजन करतात. त्यामुळे सावजीवर केलेल्या वक्तव्याशी अनेकांनी असहमती व्यक्त केली आहे.

या प्रतिक्रियांमागील भूमिका काय आहे?

अनेकांचे म्हणणे आहे की, सावजी ही केवळ तिखट मटणाची पाककृती नसून विदर्भाच्या खाद्यसंस्कृतीचा अविभाज्य भाग आहे. एखाद्या व्यक्तीचा वैयक्तिक अनुभव वेगळा असू शकतो; मात्र त्यावरून संपूर्ण सावजी खाद्यसंस्कृतीबाबत मत व्यक्त करणे योग्य नसल्याचे मत प्रतिक्रिया देणाऱ्यांनी व्यक्त केले आहे.

पुढे काय?

समाजमाध्यमांवर या विषयावरील प्रतिक्रिया सुरूच असून काही सामाजिक संघटना पुढील भूमिका जाहीर करण्याच्या तयारीत आहेत. या पार्श्वभूमीवर तुकाराम मुंढे यांच्याकडून या वादावर स्पष्टीकरण येते का, याकडे लक्ष लागले आहे.