Uday Samant : महाविकास आघाडीत मोठी फूट पडणार… उद्योगमंत्री उदय सामंत स्पष्टच म्हणाले…

‘मविआतून निवडून आलेले अनेक आमदार आमच्या संपर्कात आहेत. जे आमच्यावर आरोप करतात, त्यातील अनेक जण हे शिंदे आणि अजितदादांना भेटले आहेत. याची प्रचिती तुम्हाला येत्या दोन महिन्यात येईल,’असा दावा उद्योगमंत्री उदय सामंत यांनी बुधवारी केला. विधान भवन परिसरात ते बोलत होते. महापालिका निवडणुकीनंतर भाजपा त्यांच्या मित्रपक्षाला कढीतील गोडलिंबाप्रमाणे बाहेर काढेल, असे वक्तव्य केले आहे. तसेच दोन्ही गटातील आमदार भाजपमध्ये जातीन, असेदेखील म्हटले आहे. यावर बोलताना उद्योगमंत्री उदय सामंत म्हणाले,‘महापालिकेच्या निवडणुकीनंतर महायुतीमध्ये कुठलेही मतभेद निर्माण होणार नाहीत.

मविआला विधानसभेत कमी जागा मिळाल्या आहेत. स्थानिक स्वराज्य संस्थांच्या निवडणुकीतही त्यांची विधानसभेसारखीच परिस्थिती होणार आहे. निवडणुकीमध्ये जनतेने यांची दखलदेखील घेतलेली नाही.’ सामंत ३५ आमदारांसह भाजपच्या संपर्कात असल्याचा दावा चंद्रकांत खैरे यांनी केला आहे. त्यावर बोलताना ते म्हणाले,‘मला माझ्या राजकीय मर्यादा माहिती आहेत. ज्या एकनाथ शिंदे यांनी मला उद्योगमंत्री म्हणून राज्यात काम करण्याची संधी दिली, त्यांच्याविरुद्ध जाणे ही माझी संस्कृती नाही. जे (चंद्रकांत खैरे) २०१४ च्या निवडुकीत पराभूत झालेत, ते कितीदा एकनाथ शिंदे यांच्याकडे अंबादास दानवेंच्या तक्रारी घेऊन आलेत. त्यांनी त्या गोष्टींचे आत्मचिंतन करावे. ते अध्यात्मिक वृत्तीचे आहेत, देवाला मानतात. त्यांनी देवापुढे सांगावे की आम्ही पक्षप्रमुख वा दानवे यांच्याबाबत अद्वातद्वा बोलेलेलो नाही. त्यांनी जे काही कर्तृत्व दाखविले आहे, ते सर्वांना माहिती आहे. तेसुद्धा आमच्यासोबत येणार होते. पण, का आले नाही याबाबत कल्पना नाही.’

इतर योजनांवर परिणाम होणार नाही

लाडक्या बहिणीसाठी कृषी आणि सामाजिक न्याय विभागाचा निधी वळविला असल्याचा आरोप होत आहे. त्यावर बोलताना उद्योगमंत्री उदय सामंत म्हणाले,‘लाडक्या बहिणीसाठी अर्थसंकल्पामध्ये तरतूद केली आहे. त्यामुळे ही योजना बंद होणार नाही. तसेच इतर विभागाच्या योजनांवरदेखील परिणाम होणार नाही.’