नागपूर : उपमुख्यमंत्री अजीत पवार यांच्या विमानाला झालेल्या अपघाताबाबत अनेक प्रश्न उपस्थित होत आहे, लोकांच्या मनात शंका आहे. त्यामुळे सीआयडी चौकशीपेक्षा न्यायाधीशांच्या अध्यक्षतेखाली चौकशी व्हावी, अशी मागणी काँग्रेस विधिमंडळ नेते विजय वडेट्टीवार यांनी केली. ते शुक्रवारी नागपुुरात माध्यम प्रतिनिधींशी बोलत होते.
अजित पवार राज्यातील एक महत्वाचे नेते होते. त्यांच्या अपघाताबाबत शंका घेतल्या जात आहेत. लोकांच्या मनात कुठल्याही प्रकारचा संशय राहू नये. तपासून वस्तुस्थिती समोर यावी. त्यासाठी न्यायाधीशांच्या अध्यक्षतेखाली चौकशी व्हायला हवी, असेही वडेट्टीवार म्हणाले. दोन्ही राष्ट्रवादी पक्ष एकत्र यावेत का? त्या पक्षात कुणाला मंत्रिपद, उपमुख्यमंत्री पद द्यावे हा त्यांचा निर्णय आहे. ज्येष्ठ नेते शरद पवार यांचे वय पाहता मतभेद बाजूला ठेवून सगळ्यांनी एकत्र यावे, अशी भावना वडेट्टीवार यांनी व्यक्त केली.
येत्या अधिवेशनात विरोधी पक्ष नेते पदाबाबत सरकार नवीन विधेयक आणणार आहे. या विधेयकाला वडेट्टीवार यांनी विरोध करत याची काय गरज आहे असा सवाल उपस्थित केला. राज्यात उपमुख्यमंत्री पद आहे जे संवैधानिक नाही पण विरोधी पक्ष नेते पद द्यायचे नाही म्हणून सरकार पळवाटा शोधत आहे. सरकारला हवे तसा कारभार करायचा आहे, विरोध नको म्हणून हे विधेयक आणले जात आहे ही सरकारची दुटप्पी भूमिका असल्याची टीका वडेट्टीवार यांनी केली.
जिल्हा परिषद निवडणूक आणि टीईटी परीक्षेच्या तारखा एकच दिवशी आल्या आहेत. यामुळे शिक्षकांना त्रासाला सामोरे जावे लागणार आहे.राज्य सरकार आणि निवडणुकीत आयोगात समन्वय नाहीये का? असा प्रश्न वडेट्टीवार यांनी विचारला. शिक्षकांना असे वेठीस धरणे हा त्यांचा छळ आहे, अशी टीका वडेट्टीवार यांनी केली.
चंद्रपूर काँग्रेस नगरसेवक प्रकरणी पोलिसांची चौकशी सुरू
समृद्धी महामार्गावर काँग्रेसच्या नगरसेवकाची बस थांबवून त्यांना धमकावण्यात आले, हल्ला करण्याचा प्रयत्न झाला. यावेळी चाकू, तलवार, बंदूक असल्याची माहिती मिळाली. पोलीस या प्रकरणी तपास करत असल्याची माहिती वडेट्टीवर यांनी दिली. समृद्धी महामार्गावर घडलेल्या प्रकरणी कोणाचा हात आहे, कोणी हल्ला केला याबाबत अधिकची माहिती नाही, पण पोलीस याबाबत तपास करत असल्याचे वडेट्टीवार यांनी स्पष्ट केले.
