पबजीमुळे एका तरुणाने गळफास घेऊन आत्महत्या केली. ही घटना कपीलनगर पोलीस ठाण्याच्या हद्दीतील रमाईनगर परिसरात घडली. शुभम लालाजी यादव (२४) रा. रमाईनगर, नारी रोड, कपिलनगर असे आत्महत्या करणाऱ्या तरुणाचे नाव आहे. लालाजी यादव यांचे नारी रोडवर छोटेसे गॅरेज आहे. शुभमला मोबाईलवर पब्जी खेळण्याचे वेड होते. काही दिवसांपासून शुभम तणावात होता. शुक्रवारी रात्री दहा वाजता त्याने कुटुंबीयांसोबत जेवण केले व आपल्या खोलीत झोपायला निघून गेला. अकरा वाजेपासून तर बारा वाजेपर्यंत तो मोबाईलवर पब्जी खेळला आणि वॉट्?सअ‍ॅपवर मित्रांशी संवादही साधला. त्यानंतर त्याने खोलीचे दार बंद केले. बारा वाजेच्या सुमारास त्याची बहीण त्याच्या खोलीत गेली असता शुभम पंख्याला गळफास घेतलेल्या अवस्थेत आढळून आला. शुभमला मेयोत दाखल केले. मात्र, तोपर्यंत शुभमचा मृत्यू झाला होता. या प्रकरणी कपीलनगर पोलिसांनी आकस्मिक मृत्यूची नोंद केली.
