१९९३ मुंबई साखळी बॉम्बस्फोटातील आरोपी आणि फरार असलेल्या टायगर मेमनचा भाऊ युसूफ मेमन याचा मृत्यू झाला आहे. नाशिकमधील कारागृहात युसूफ मेमनचा मृत्यू झाला. मृत्यूचं नेमकं कारण अद्याप कळलं नसल्याची माहिती कारागृह प्रशासनाने दिली आहे. शवविच्छेदनासाठी मृतदेह धुळे येथे पाठवण्यात आला आहे. नाशिकचे पोलीस आयुक्त विश्वास नांगरे-पाटील यांनी वृत्ताला दुजोरा दिला आहे. पीटीआयने यासंबंधी वृत्त दिलं आहे. युसूफ मेमनला २००७ मध्ये जन्मठेपेची शिक्षा सुनावण्यात आली होती. सुरुवातीला त्याला मुंबईमधील आर्थर रोड कारागृहात ठेवण्यात आलं होतं. नंतर त्याला नाशिक जेलमध्ये शिफ्ट करण्यात आलं होतं. युसूफ मेमनवर मुंबई साखळी बॉम्बस्फोटाचा कट रचण्याचा आरोप होता. Yusuf Memon, a 1993 Mumbai serial blasts case convict and brother of absconding accused Tiger Memon, has died at Nashik Road prison in Maharashtra; cause of death yet to be ascertained: Jail official — Press Trust of India (@PTI_News) June 26, 2020 १२ मार्च १९९३ रोजी दोन तास १० मिनिटांमध्ये मुंबईत एकामागोमाग एक १३ बॉम्बस्फोट झाले होते. या साखळी बॉम्बस्फोटात २५७ लोक ठार झाले होते. तर १४०० लोक जखमी झाले. बॉम्बस्फोटात दाऊद इब्राहिम, टायगर मेमन आणि त्याचा भाऊ युसूफ मेमनसहित इतरांचं नाव आलं होतं. बॉम्बस्फोटानंतर दाऊद इब्राहिम आणि टायगर मेमन यांनी भारत सोडून पळ काढला होता.