इगतपुरी : तालुक्यातील अतिदुर्गम भागात असलेल्या कुरुंगवाडी येथे सोमवारी पहाटे बिबटय़ाने के लेल्या हल्ल्यात वृद्ध गंभीर जखमी झाला. या वृद्धावर घोटी ग्रामीण रुग्णालयात प्राथमिक उपचारानंतर नाशिक येथे जिल्हा रुग्णालयात दाखल करण्यात आले असल्याची माहिती खैरगाव येथील वनपाल भाऊसाहेब राव यांनी दिली. वन विभागाने दिलेल्या माहितीनुसार कुरुंगवाडी येथे कानू चिमा धुपारे (७५) हे राहतात. रविवारी धुपारे हे झोपडीच्या पडवीत झोपलेले असताना सोमवारी पहाटे चारच्या सुमारास अचानक बिबटय़ाने हल्ला केल्याने ते गंभीर जखमी झाले. वन परिक्षेत्र अधिकारी रमेश ढोमसे यांच्या मार्गदर्शनाखाली खैरगाव वनपाल भाऊसाहेब राव, वनरक्षक नरेश नावकर, प्रियंका साबळे, सोमनाथ जाधव, रूपाली गायकवाड, चिंतामण गाडर, एफ. जी. सैयद, मुजावर शेख आदींनी घटनास्थळी धाव घेत पाहणी के ली. ऑगस्टमध्ये याच भागातील नांदगावसदो येथे एका घरात बिबटय़ा मादीने चार पिल्लांसह १० ते १२ दिवस वास्तव्य के ल्याने दहशत पसरली होती. वृद्धावर हल्ला करणारी तीच बिबटय़ा मादी आहे काय, हे वन विभागाकडून तपासले जात आहे.
