मेळघाटचा सन्मान करा, राखी स्वत: तयार करा, सृष्टीबंध राखी वापरा, प्रकृतीचे रक्षण करा असा संदेश देत येथील उन्नती प्राथमिक शाळेतील चिमुकल्यांनी बांबूच्या आकर्षक राख्या तयार करून आपली कल्पकता दाखवत मेळघाटच्या आदिवासी बांधवांना आर्थिक हातभार लावून सामाजिकता जपली. अमरावतीच्या धारणी तालुक्यातील मेळघाटच्या आदिवासींना मदत म्हणून सामाजिक कार्यकर्ते बापू बागड यांनी बांबूपासून आकर्षक राख्या तयार करण्याचे साहित्य विकत घेऊन उन्नती शाळेतील चिमुकल्यांना दिले. विद्यार्थिनींनी त्यापासून राख्या तयार केल्या. बागड यांनी साहित्य विकत घेऊन आदिवासी बांधवांना मदत करतानाच उन्नती शाळेतील मुलांना त्यांच्यातील कौशल्यास वाव दिला. त्यासाठी शालेय समिती अध्यक्ष सुभाष मुसळे, मुख्याध्यापक नंदलाल धांडे यांनी कौतुक केले. अश्विनी अहिरे, नीलम पाटील, कल्पना विसपुते यांचे मार्गदर्शन लाभले आहे.