छगन भुजबळ यांचा पाय आणखी खोलात नाशिक-मुंबई रस्त्याच्या चौपदरीकरणाचे काम करणाऱ्या अशोका बिल्डकॉनने भुजबळ फाऊंडेशनला दिलेल्या कोटय़वधी रुपयांच्या व्यवहारांची छाननी करण्यासाठी सक्तवसुली संचालनालयाच्या पथकांनी या कंपनीच्या मुख्यालयासह संचालकांचे निवासस्थान आणि पिंपळगाव बसवंतच्या येथील टोल नाक्यावर छापे टाकले. सायंकाळी उशिरापर्यंत कागदपत्रांची छाननी सुरू होती. अशोका बिल्डकॉन आणि भुजबळ फाऊंडेशन यांच्यात झालेल्या आर्थिक व्यवहारांची चौकशी करण्यासाठी सक्तवसुली संचालनालयाच्या पथकासमवेत आयकर विभागाचेही अधिकारी असल्याचे सांगण्यात आले. काही दिवसांपूर्वी खा. किरीट सोमय्या यांनी अशोका बिल्डकॉनचे संचालक अशोक कटारिया आणि आशिष कटारिया यांचे भुजबळांशी आर्थिक संबंध असल्याचे आरोप केले होते. भुजबळ फार्म येथे बांधलेल्या महालासाठी अशोका बिल्डकॉनने कोटय़वधींची रक्कम भुजबळ फाऊंडेशनला दिली. त्या मोबदल्यात भुजबळांनी अशोकाला नाशिक-मुंबई राष्ट्रीय महामार्गाच्या विस्तारीकरणासह राज्यातील अनेक रस्त्यांची कामे मिळवून दिल्याची तक्रार त्यांनी केली होती. या व्यवहारातील ४० कोटींच्या बँक खात्यातील दस्तावेज सोमय्या यांनी सादर केले होते. अशोका बिल्डकॉनचे अशोक कटारिया आणि आशिष कटारिया यांनी भुजबळ कुटुंबियांना ‘फिफा’चे फुटबॉल सामने दाखविण्यासाठी विमानाने परदेशात नेले होते. या कंपनीच्या व्यवहारांची चौकशी करून संबंधितांवर कारवाईची मागणी त्यांनी केली.